Амбасадар Ізраіля развітваецца з Беларуссю

Источник материала:

11 декабря 2008 Политика
Кастусь ЛАШКЕВІЧ, TUT.BY Сапраўдны прарыў адбыўся ў беларуска-ізраільскіх стасунках за апошнія чатыры гады. Аб гэтым 11 снежня ў Ізраільскім культурна-інфармацыйным цэнтры заявіў Надзвычайны і Паўнамоцны Пасол Дзяржавы Ізраіль у Рэспубліцы Беларусь Зееў Бен-Ар’е, праца якога ў нашай краіне амаль скончаная.  Сімвалічна, што своеасаблівае развітанне амбасадара з Беларуссю адбылося ў межах прэзентацыі першай у гісторыі анталогіі ізраільскай літаратуры "Чалавек, які скраў Сьцяну Плачу" ў перакладзе на беларускую мову Паўла Касцюкевіча (гутарку з ім чытайце TUT). Гэта ўжо другая кніга перакладаў Касцюкевіча, у падрыхтоўцы і выданні якой дыпламат браў чынны ўдзел. Летась у кнігарнях з’явіўся зборнік выбраных апавяданняў культавага ізраільскага пісьменніка Этгара Керэта "Кіроўца аўтобуса, якi хацеў стаць Богам".  “Прынамсі два помнікі матэрыяльнай культуры я пакідаю па сабе ў Беларусі”, — адзначыў на прэзентацыі Зееў Бен-Ар’е.  Адказваючы на пытанне карэспандэнта TUT.BY, амбасадар заявіў, што “мы стаім на парозе актывізацыі ізраільска-беларускіх сувязяў. Чатыры гады маёй працы тут не былі марнымі. Ім папярэднічала закрыццё і ўзнаўленне ізраільскага дыппрадстаўніцтва ў Беларусі. Таму, па сутнасці, нам выпала пачынаць амаль з нуля і за гэты час была закладзена грунтоўная база двухбаковых стасункаў: міністэрскія і парламенцкія візіты, культурныя праекты…”  Па словах дыпламата, калі яму прыпала многа падрыхтоўчай работы, дык ў ягонага пераемніка з’явіцца болей канкрэтных праектаў: цяперашнія знешнія абставіны гэтаму спрыяюць.  “Той факт, што трохгадовы пасольскі тэрмін знаходжання ў Беларусі з маёй згоды быў працягнуты яшчэ на год, сведчыць аб тым, што мне тут было цікава. У Беларусі ў мяне з’явілася многа сяброў сярод пісьменнікаў і мастакоў. Апроч іхніх падарункаў я павязу дамоў блізкі мне вобраз беларускай прыроды — лясы, рэкі, азёры, чаго ў Ізраілі так бракуе". "Амбасадар выказаў пажаданне, каб у Беларусі надалей павялічваўся попыт на беларускую кнігу, які гасілі дзесяцігоддзямі і які ледзь не згас. У сваю чаргу перакладчык і літаратар Павел Касцюкевіч пажадаў Зееву Бен-Ар’е, які прачытаў на “мове” больш за сярэднестатыстычнага беларуса і пераклаў на іўрыт два апавяданні Васіля Быкава, стаць своеасаблівым паслом беларускай культуры ў Ізраілі.