Год беларускай мовы

Источник материала:

Можа быць не толькi ў жыццi аднаго чалавека, якi вырашыў гэта для сябе. Наступны год будзе дакладна годам беларускай мовы для "звяздоўцаў": наша газета працягвае заставацца адзiным штодзённым выданнем, якое друкуецца на беларускай мове i знаходзiць падтрымку дзяржавы. Мы ўдзячныя за разуменне людзям, якiя чытаюць родную газету на роднай мове. Менавiта таму мы верым у тое, што вы, нашы шаноўныя чытачы, ведаеце, як прыгожа можа гучаць беларускае слова — трэба яго толькi вымавiць услых. Варта пачаць. Ды хоць бы з Новага года!

Iнiцыятыву "Звязды" аб’явiць Год беларускай мовы вiтае дырэктар Iнстытута мовы i лiтаратуры iмя Янкi Купалы i Якуба Коласа Аляксандр Лукашанец:

— Гэта вельмi слушная прапанова. У нашым грамадстве падтрымкi i пашырэння патрабуе менавiта беларуская мова як адна з дзяржаўных моў нашай краiны. Абсалютна натуральна, што ў Беларусi павiнен быць год беларускай мовы. Усведамленне важнасцi нацыянальнай мовы народа, сярод якога жывеш, сапраўды сёння вельмi актуальна. Веданне мовы дазваляе больш правiльна зразумець менталiтэт народа, яго культуру, традыцыi, гiсторыю.