...

Источник материала:

У Беларусi на новае месца жыхарства i працы сёлета ў студзенi перасялiлiся 19 сем’яў беспрацоўных, паведамляе БЕЛТА. У iх лiку 5 сем’яў у Мiнскай вобласцi, 4 — у Магiлёўскай, па 3 — у Вiцебскай i Гомельскай, па 2 — у Брэсцкай i Гродзенскай абласцях.

Учора ноччу ў вытворчым цэху "Гомсельмаша" ўзнiк пажар. Узгаранне адбылося ў афарбовачнай камеры цэха афарбоўкi i зваркi. Аператыўна спрацавалi заводскiя выратавальнiкi — удалося не дапусцiць распаўсюджання агню. Прычыны пажару высвятляюцца.

Увесцi абавязковую плату за наведванне хворымi палiклiнiкi i лячэнне ў бальнiцах прапанаваў вiцэ-прэзiдэнт Асацыяцыi лячэбных устаноў Лiтвы. Па яго словах, гэтую iдэю падтрымлiвае i мiнiстр аховы здароўя краiны. Плата, на iх думку, можа быць вельмi невысокай (1,5-2 еўра за дзень у бальнiцы), але гэта адвучыла б некаторых хадзiць у палiклiнiкi не па лячэнне, а па камунiкатыўныя стасункi, у вынiку чаго ўтвараюцца чэргi.

Сабака па мянушцы Джордж з пароды тэр’ераў пасмяротна ўзнагароджаны медалём Брытанскай асацыяцыi ветэрынараў за абарону пяцярых дзяцей ад двух пiтбультэр’ераў у Новай Зеландыi. Пара пiтбуляў напала на дзяцей ад трох да 12 гадоў. Абараняючы малых, 14-гадовы сабака атрымаў сур’ёзныя раны i пазней памёр у ветэрынарнай клiнiцы. Генерал-губернатар Новай Зеландыi асабiста ўручыў узнагароду гаспадарам загiнулага сабакi. Залаты медаль павесiлi на шыю помнiка, якi быў устаноўлены ў горадзе ў гонар учынку сабакi.

У Нiдэрландах адчынiлiся першыя прытулкi для мужчын, якiя сталi ахвярамi хатняга гвалту. Чатыры такiя ўстановы адчынiлiся ў Гаазе, Ратэрдаме, Амстэрдаме i Утрэхце. Згодна са статыстыкай, кожны пяты, хто пацярпеў ад рук сваёй другой палавiнкi — мужчына. Мiж тым мужчынам намнога цяжэй падзялiцца сваiмi перажываннямi з iншымi, чым жанчынам, i яны, каб заглушыць перажываннi, ужываюць алкаголь цi наркотыкi. Пакуль што ў прытулкi могуць трапiць 40 чалавек, але аўтары праекта мяркуюць, што гэтага не хопiць для ўсiх мужчын, якiя маюць патрэбу ў дапамозе.