Зялёная камета ляціць да Зямлi

Источник материала:

Незвычайнага зеленаватага колеру камету Люлiнь змогуць убачыць жыхары Зямлi 25 лютага каля 6 гадзiн ранiцы па беларускiм часе. У гэты час яна максiмальна наблiзiцца да нашай планеты — на адлегласць у 61 млн км. Паводле звестак NASA, iншай магчымасцi паназiраць за гэтай незвычайнай госцяй з такой адлегласцi не будзе.

Характэрны колер Люлiнь надаюць малекулы вугляроду i ядавiтага газу дыцыян, якiя ўваходзяць у склад яе ядра — пад уздзеяннем сонечных прамянёў i ва ўмовах беспаветранай прасторы ствараюць зелянявае свячэнне. 24-25 лютага Люлiнь павiнна дасягнуць кропкi побач з Сатурнам i яркiмi зоркамi Спiкi i Рэгула. З Зямлi камету лепш назiраць у тэлескоп або ў бiнокль.

Касмiчнаму целу прысвоена назва абсерваторыi Тайваня, астраномы якой 2 гады таму першымi сфатаграфавалi камету. Славу першаадкрывальнiка з iмi падзялiў кiтайскi студэнт, якi заўважыў яе ў лiпенi 2007 г., да таго, як яе з’яўленне ў Сонечнай сiстэме зафiксавалi тайванскiя астраномы.