Сяргей Сiдорскi: Мы будзем развiваць малыя i сярэднiя гарады так, як намецiлi

Источник материала:

Летась Дзяржаўная комплексная праграма развiцця рэгiёнаў, малых i сярэднiх пасяленняў на 2007-2010 гады ў цэлым рэалiзоўвалася паспяхова, падвёў вынiкi ўчарашняга яе абмеркавання на пасяджэннi Прэзiдыума Савета Мiнiстраў Беларусi прэм’ер-мiнiстр Сяргей Сiдорскi. "Паказчыкi развiцця малых i сярэднiх гарадоў значна палепшылiся, — зазначыў кiраўнiк Урада. — Галоўнае, што мы там ствараем новыя прадпрыемствы, новыя працоўныя месцы, што людзi атрымлiваюць стабiльную зарплату".

Што датычыцца апошняга тэзiса прэм’ера, то, паводле звестак, якiя прывёў на пасяджэннi намеснiк мiнiстра эканомiкi Андрэй Тур, у мiнулым годзе ў малых i сярэднiх гарадскiх пасяленнях за кошт розных крынiц фiнансавання было створана больш за 31 тысячу новых працоўных месцаў. Колькасць жа насельнiцтва, занятага ў эканомiцы малых i сярэднiх гарадскiх пасяленняў, узрасла ў параўнаннi з папярэднiм годам амаль на 40 тысяч чалавек. Па вынiках леташняга года намiнальная налiчаная сярэднямесячная зарплата склала 731,2 тысячы рублёў, альбо 82,6 % ад узроўню зарплаты па рэспублiцы. Рэальная зарплата павялiчылася на 7,3 %.

Гаворачы пра сiтуацыю з вытворчасцю ў малых i сярэднiх гарадах, Андрэй Тур, у прыватнасцi, паведамiў, што выпуск спажывецкiх тавараў тут павялiчыўся на 13,8 %, было выраблена тавараў на суму больш як 6 трыльёнаў рублёў, цi 25,6 % агульнага аб’ёму па рэспублiцы.

Аднак, нягледзячы на добрыя вынiкi па рэалiзацыi праграмы, шэраг пастаўленых заданняў у асобных населеных пунктах былi не выкананыя. Напрыклад, прыгадвалася, што з заданнямi па вытворчасцi прамысловай прадукцыi не справiлiся ў 38 населеных пунктах, па вытворчасцi спажывецкiх тавараў — у 49, па налiчанай сярэднемесячнай зарплаце — у 16, па знiжэннi ўзроўню беспрацоўя — у 7. Акрамя таго, летась не рэалiзаваны 32 важнейшыя iнвестыцыйныя праекты, а заданне па паступленнi не менш як 2 працэнтаў даходу ў бюджэты базавага ўзроўню ад зноў створаных арганiзацый не выканана ўсiмi аблвыканкамамi, за выключэннем Брэсцкага.

Разам з тым, на думку Сяргея Сiдорскага, Урад стварыў усе неабходныя ўмовы, каб малыя i сярэднiя гарады развiвалiся. "Але ёсць раёны, у якiх мы чакаем больш эфектыўнага развiцця, — падкрэслiў прэм’ер. — Мы зацiкаўлены, каб развiвалася перапрацоўка, прамысловая вытворчасць з тым, каб стваралiся новыя працоўныя месцы". Галоўнае ж, лiчыць Сяргей Сiдорскi, каб нашы раёны максiмальна пераходзiлi ад пастаяннага датавання з абласнога i рэспублiканскага бюджэтаў да самадастатковасцi.

Для таго, каб мясцовая ўлада працавала больш эфектыўна, Сяргей Сiдорскi прапанаваў прыняць рашэнне аб давядзеннi да малых i сярэднiх гарадоў колькасных паказчыкаў развiцця малога i сярэдняга бiзнэсу. "Падабаецца гэта камусьцi цi не, але вынiк будзе толькi тады, калi мы атрымаем развiццё малога i сярэдняга бiзнэсу ў малых i сярэднiх гарадах, — патлумачыў ён. — На месцах дастаткова спецыялiстаў, якiя абавязаныя праводзiць работу сярод насельнiцтва i казаць пра перавагi стварэння малых i сярэднiх прадпрыемстваў. Мы стварылi ў раёнах iльготныя ўмовы для працы прадпрымальнiкаў, i людзям трэба гэта растлумачыць". Як мяркуе прэм’ер, сёння ў насельнiцтва дастаткова накопленых сродкаў, каб у рэспублiцы стваралiся малыя i сярэднiя прадпрыемствы.

Сяргей Сiдорскi даручыў аблвыканкамам на працягу месяца разгледзець пытаннi рэалiзацыi праграмы i вызначыцца з яе выкананнем сёлета. Паводле яго слоў, няма нiякiх падстаў згортваць праграму, нават ва ўмовах сусветнага фiнансавага крызiсу. "Мы будзем развiваць малыя i сярэднiя гарады так, як намецiлi", — канстатаваў прэм’ер.

Як паведамiў на пасяджэннi Прэзiдыума Саўмiна старшыня Дзяржаўнага камiтэта па маёмасцi Георгiй Кузняцоў, у рэспублiцы рыхтуюцца змяненнi ва ўказ Прэзiдэнта, якiя рэгулююць правiлы продажу аб’ектаў, што не выкарыстоўваюцца. Зараз усе змяненнi знаходзяцца на ўзгадненнi ў Дзяржкантролi. Паводле слоў Георгiя Кузняцова, змяненнi значна спросцяць працэдуру продажу нявыкарыстаных аб’ектаў.