Мiльярды еўра на падтрымку банкаў

Источник материала:

Уплывовыя мiжнародныя фiнансавыя ўстановы — Еўрапейскi банк рэканструкцыi i развiцця (ЕБРР), Група Еўрапейскага iнвестыцыйнага банка (ЕІБ) i Група Сусветнага банка вырашылi выдаткаваць да 24,5 мiльярда еўра на падтрымку банкаўскаму сектару краiн Усходняй i Цэнтральнай Еўропы, якiя моцна пацярпелi ад глабальнага эканамiчнага крызiсу.

Грошы пойдуць на пераадоленне крызiсу, у тым лiку ў iнфраструктуры i гандлi, а таксама ў сферы традыцыйных капiталаўкладанняў i кансультатыўных паслуг. Па словах прэзiдэнта ЕБРР, на працягу шматлiкiх гадоў рост еўрапейскай iнтэграцыi быў крынiцай росквiту i ўзаемнай выгады, а таму нельга дазволiць, каб гэты працэс прыпынiўся.

У Бруселi лiчаць, што надышоў час, калi Еўропа павiнна аб’яднацца, каб з-за эканамiчнага крызiсу не згубiць дасягненнi апошнiх дваццацi гадоў. Там цвёрда ўпэўненыя ў карысцi скаардынаваных дзеянняў устаноў i структур Еўрапейскага саюза, фiнансавых устаноў, банкаўскiх груп, увогуле ўрадаў усiх еўрапейскiх краiн для выцягвання Усходняй i Цэнтральнай Еўропы са смяротных для яе банкаў i прамысловасцi абдымкаў крызiсу. Еўрапейскiя банкiры моцна разлiчваюць на тое, што план сумесных дзеянняў дапаможа iстотна паскорыць выдачу праз банкi неабходных фiнансавых сродкаў для тых, каму пагражае банкруцтва.