...

Источник материала:

Споўнiлася 105 гадоў з дня нараджэння Паўлюка Труса, вядомага беларускага паэта. Памёр у 1929 годзе ад тыфу. Яго iмем названы Уздзенская раённая бiблiятэка i вулiца ў Гомелi.

Трохгадовая дзяўчынка з Брэста была смяротна траўмаваная тэлевiзарам, якi ўпаў з тумбы. Трагедыя адбылася на вачах бацькоў. Маладая сям’я мае яшчэ адно малое дзiця. Праверку праводзiць пракуратура Маскоўскага раёна Брэста.

У памежным пункце пропуску "Варшаўскi мост" супрацоўнiкамi Брэсцкай мытнi спынена спроба вывазу за мяжу буйной сумы незадэклараванай валюты. У багажы грамадзянiна Расii было выяўлена 43,8 тыс. еўра. Грошы былi схаваныя ў адной з кнiг, дзе папярэдне была выразаная частка старонак па памеры купюр. Мужчыну выдала хваляванне, якое не засталося незаўважаным супрацоўнiкам мытнi.

Шэсць месяцяў арышту атрымаў жыхар Оршы за пагрозы забiць былую жонку. Папужаць жанчыну ён вырашыў ноччу — разведзеныя сужэнцы жылi ў адной кватэры. Ён прыставiў да яе галавы самаробны пiсталет i прапанаваў развiтацца з малой дачкой, якая прачнулася. Ён быў цвярозы. Раней аршанец прыцягваўся да адказнасцi за пагрозы ў адрас жонкi i за яе збiццё, але без пазбаўлення волi. На гэты раз суд прыгаварыў яго да паўгода арышту.

Пiсталет, бiту i нож выкарыстоўвалi трое мiнскiх школьнiкаў пры рабаўнiцкiх нападах. Пры дапамозе гэтага арсенала яны адабралi адзенне ў двух 16-гадовых i двух 18-гадовых жыхароў Мiнска. Узбуджана крымiнальная справа.

Учора прэм’ер-мiнiстр Украiны Юлiя Цiмашэнка прыйшла на пасяджэнне Кабмiна з новай прычоскай i без прывычнай касы. Днём нараджэння касы прынята лiчыць 19 красавiка 2001 года, калi Цiмашэнка ўразiла ўдзельнiкаў Кангрэса арганiзацый Украiны сваiм новым iмiджам. Такiм чынам, восем гадоў каса была яе вiзiтнай карткай.    

49-гадовы таксiст з аргенцiнскага гарадка Ла-Плата знайшоў у сябе ў салоне партфель з 35 тыс. долараў, якiя забыў у яго машыне адзiн пенсiянер. Пацярпелы адразу ж звярнуўся ў палiцыю, якая адмовiлася яму дапамагчы. Але пенсiянера выратаваў таксiст. Ён сам знайшоў свайго пасажыра па дакументах, якiя былi ў партфелi, i аддаў яму грошы. Шчаслiвы пенсiянер вырашыў узнагародзiць сумленнага таксiста сумай у 3500 долараў, што складае 10 % ад вернутых грошай. Але журналiсты, якiя даведалiся пра гэтую гiсторыю, заявiлi, што 3500 — занадта мала для такога сумленнага чалавека, i аб’явiлi аб зборы сродкаў для яго. На рахунак паступiла больш за 3 тыс. долараў, таксiсту падарылi таксама 20 аўтамабiльных шынаў, талоны на 10 сеансаў заспакаяльнага масажу, а яго дзецям прапанавалi бясплатна прайсцi курс французскай мовы.