У Барысаве згуляюць БАТЭ ўзору 1999 года і зборная Беларусі 90-х гадоў

Источник материала:

12 чэрвеня ў Барысаве адбудзецца футбольны матч паміж мясцовым БАТЭ ўзору 1999-года і зборнай Беларусі 90-х гадоў. Такім чынам адзін з самых тытулаваных клубаў краіны збіраецца адсвяткаваць 10-годдзе сваёй першай перамогі ў чэмпіянаце Беларусі.

Тады ў БАТЭ сярод іншых гулялі Віктар Ганчарэнка, Аляксандр Глеб, Віталь Кутузаў, Васіль Хамутоўскі, Аляксандр Ермаковіч. Трэнер барысаўскага БАТЭ, магчыма, выйдзе на поле ў матчы супраць зборнай Беларусі 90-х гадоў. “Калі здароўе дазволіць. У яго ж была траўма. Таму, як дазволіць здароўе. Магчыма, будзе”, — адзначыў у размове з Еўрарадыё прэс-сакратар БАТЭ Сяргей Дашкевіч.

Ці згуляюць усе зоркі таго складу, стане вядома бліжэй да гульні, распавёў Сяргей Дашкевіч: “Прапановы зроблены шмат каму, але не факт, што ў людзей атрымаецца прыехаць. У кожнага ж свае планы”.

Як паведамляе афіцыйны сайт БАТЭ, ужо створаны арганізацыйны камітэт, які прыступіў да падрыхтоўкі сустрэчы. Уваход на матч будзе каштаваць 2 тысячы.

Усе грошы, сабраныя ад продажу квіткоў, пойдуць на дабрачынныя мэты, у прыватнасці на аказанне дапамогі аднаму з дзіцячых прытулкаў Барысава.