Праеўрапейскіх кангрэсаў можа быць некалькі

Источник материала:

21 мая 2009 Политика
Алег МЫЦІК, МЫ Каардынатар Еўрапейскай кааліцыі Мікола Статкевіч заявіў, што яна вельмі здзіўленая лістом лідэра руху “За свабоду” Аляксандра Мілінкевіча” да дэмакратычных актывістаў, у якім ён запрашае іх на Кангрэс праеўрапейскіх сіл.

Са словаў Статкевіча, Еўрапейская кааліцыя абвясціла аб скліканні такога кангрэсу яшчэ ўзімку мінулага года. А сёлета была створаная ініцыятыўная група, у якую ўвайшлі чатыры суб’екты Еўрапейскай кааліцыі, а таксама АГП, БНФ, БХД і рух “За свабоду”.

“Але сем суб’ектаў з васьмі пагадзіліся з нашай стратэгіяй, акрамя руху “За свабоду”, – распавёў Мікола Статкевіч радыё “Свабода”. – І рух “За Свабоду” два апошнія месяцы абяцаў нам прапанаваць альтэрнатыўны варыянт стратэгіі для абмеркавання. І казаў так: “Гэта будзе ў наступны панядзелак”. Два месяцы – “у наступны панядзелак”. Мы, як кажуць, пачалі губляць цярпенне. Але раптам бачым гэтую заяву... Мы не разумеем матываў для гэтай заявы і са здзіўленнем яе ўспрынялі”.

21 траўня адбылася сустрэча зацікаўленых бакоў. На ёй, у прыватнасці, прысутнічалі адзін з сустаршыняў па стварэнні БХД Віталь Рымашэўскі, намеснік старшыні Партыі БНФ Віктар Івашкевіч, кіраўнік выканкаму АГП Ігар Шынкарык, палітык Вячаслаў Сіўчык, намеснік старшыні руху “За свабоду” Віктар Карняенка.

У апошняга “Мы” распыталі наконт таго, пра што вялася гаворка.

“Паразумення мы, на жаль, не знайшлі. Бо прапануецца правесці кангрэс у чэрвені і вылучыць на ім адзінага кандыдата ў прэзідэнты. Мы не разумеем, нашто так спяшацца. Мы выступаем за тое, каб улетку плённа папрацаваць, правесці рэгіянальныя сходы з вылучэннем дэлегатаў і зладзіць форум увосень. Каб ён быў мабілізуючым дэмактывістаў мерапрыемствам. Вось галоўная мэта, а не называнне адзінага”, - сказаў Віктар Карняенка.

Кансультацыі “праеўрапейцаў” будуць працягнутыя. Але верагоднасць правядзення некалькіх форумаў з падобнымі назвамі і мэтамі застаецца. Зразумела, што гэта будзе не на карысць усёй апазіцыі.

Па інфармацыі “Мы”, Кангрэс праеўрапейскіх сілаў рух “За свабоду” хоча зрабіць вельмі прадстаўнічым - у прыватнасці, запрасіць на яго еўрапейскіх палітыкаў самага высокага ўзроўню. Гаворка ідзе пра прэзідэнтаў і прэм’ер-міністраў шэрагу краін ЕС.