Юрый Падабед: "У Еўропе я для сябе Амерыку не адкрыю..."

Источник материала:

23 июня 2009 Общество
Экс-камандзір мінскага палка міліцыі спецыяльнага прызначэння (былы АМАП) палкоўнік Юрый Падабед больш не сядзіць без справы. Не так даўно ён знайшоў сабе новую і даволі цікавую працу. Пра гэта ён распавёў у інтэрв’ю выданню “Тут і цяпер”.

— Юрый Мікалаевіч, нешта даўно пра Вас нічога не было чуваць. Як вашы справы?

— У маім жыцці зараз усё добра. Займаюся сям’ёй, выхоўваем разам з жонкай дачку. Нашай прынцэсе пайшоў ужо чацвёрты годзік. Так што на жыццё-быццё не скарджуся.

— Наколькі я разумею, Вы ўсё ж такі звольніліся з органаў унутраных спраў.

— Так, сышоў у запас.

— Цікава, пенсія вялікая?

— Не буду называць канкрэтныя лічбы. Заўважу толькі, што мне хапае.

ШТРЫХ ДА ТЭМЫ

Бізнесмен Юрый Чыж праславіўся не толькі сваім паспяховым бізнесам і набліжанасцю да першых асоб дзяржавы, але і складаным характарам. Прынамсі, пра своеасаблівы характар Юрыя Аляксандравіча кажуць тыя, хто не змог з ім доўга працаваць. Вядома, што Чыж даволі часта мяняў дырэктараў і трэнераў футбольнага клуба “Дынама”.

Падначаленыя Чыжа называюць яго даволі патрабавальным чалавекам, які заўсёды вымагае ад падначаленых максімуму. Дзеля справядлівасці варта адзначыць, што тыя, хто даўно працуе з Юрыем Чыжом, называюць яго чалавекам, які не помніць зла.— З даволі надзейных крыніц нашаму выданню стала вядома, што не так даўно Вы працаўладкаваліся і цяпер узначальваеце Службу бяспекі вядомага беларускага бізнесмена Юрыя Чыжа.

— Гэта праўда.

— Цяжкая праца?

— Нялёгкая. Хапае і турбот, і складанасцей.

— А Вы адказваеце за бяспеку самога Юрыя Чыжа альбо ўвогуле за прадпрыемства, якім ён кіруе?

— Мая пасада называецца “кіраўнік аддзела аховы”. Я адказваю ў тым ліку і за ахову аб’ектаў: будаўнічых, гандлёвых, офісных і гэтак далей.

— Зараз у нашай краіне ідзе барацьба з тымі, хто ў свой час быццам бы незаконна атрымаў зямельны ўчастак пад будаўніцтва загараднага дома. Пасля Вашай адстаўкі хадзілі чуткі, быццам Падабед сышоў таму, што ў яго недзе пад Мінскам была пабудавана прыгожанькая хатка…

— (Доўга смяецца.) Ну, калі ўжо “выкасілі” за незаконнае будаўніцтва нават першага намесніка міністра ўнутраных спраў і двух намеснікаў міністра, то Падабеда даўно б зачапілі, калі б было за што зачапіць! У мяне няма ніводнага незаконнага ўчастка. І ніколі не было.

— А што Вы маеце з нерухомасці?

— Аднапакаёвую кватэру. Дачы ў мяне няма. Хаця я вельмі хацеў бы яе займець.

— Перажываеце, што дагэтуль не можаце паехаць у Еўропу?

— А з мяне ж знялі санкцыі! Здаецца, паўгода таму, калі не болей. У тым так званым “чорным спісе” засталося толькі некалькі чалавек, калі не памыляюся…

— Значыць, ужо некуды за мяжу Вы пракаціліся?

— Не. Я ўжо не раз казаў, што ў Еўропе для сябе Амерыку не адкрыю.
Што ж тычыцца адпачынку, дык я нядаўна працаўладкаваўся, таму пра адпачынак яшчэ нават не задумваюся.

— А пра былую працу ўзгадваеце? Скажыце шчыра: не сумуеце па АМАПе?

— Я многа аддаў той працы часу, здароўя. Мне за сваю справу не сорамна. І сёння я не губляю кантактаў з тымі, з кім столькі гадоў адпрацаваў. Я там рэгулярна бываю, увесь час маю зносіны са сваімі былымі калегамі і падначаленымі. З цяперашнім камандзірам даволі часта сазвоньваемся.

ДАРЭЧЫ

Былыя супрацоўнікі сілавых структур даволі часта пасля завяршэння сваёй кар’еры працаўладкоўваюцца ў службы бяспекі банкаў, прадпрыемстваў, арганізацый. Лічыцца, што з іх атрымліваюцца добрыя спецыялісты ў гэтай сферы дзейнасці.

Напрыклад, былы міністр унутраных спраў Беларусі генерал Валянцін Агалец цяпер узначальвае Службу бяспекі адной вядомай кампаніі мабільнай сувязі. Да Агальца гэтую ж пасаду займаў таксама генерал міліцыі — Віктар Басалыга.

А генерал-маёр КДБ у адстаўцы Валерый Кез працуе ў Службе бяспекі “Газпрамбанка”.

НЕСАКРЭТНЫЯ МАТЭРЫЯЛЫ

Юрый Падабед скончыў Мінскую вайскова-палітычную вучэльню. Служыў на Далёкім Усходзе, у Літве, Польшчы, Нямеччыне. Скончыў Акадэмію кіравання пры прэзідэнце па спецыяльнасьці “Дзяржаўнае кіраванне і дзелавое адміністраванне”.

АМАПам кіраваў з 1999 года. У адстаўку сышоў нібыта па ўласным жаданні.

Пасля сыходу ў сваіх інтэрв’ю Падабед казаў, што можа паспрабаваць сябе ў іншай якасці на нейкім прадпрыемстве.

“Рашэнне аб сыходзе я прыняў сам, — гаварыў Юрый Мікалаевіч. — Проста вырашыў, што прыспеў час сысці. 9 гадоў адкамандаваў. Здароўе ж у мяне адно… Трэба хоць дачку на ногі падняць”.

На пытанні аб сваім далейшым лёсе адразу пасля сыходу адказваў так: “Усюды патрэбна служба бяспекі, дый самому можна нешта паспрабаваць зрабіць. У мяне ж, здаецца, і галава на месцы. Я маю дыплом педагога: магу выкладаць гісторыю і грамадазнаўства. У прынцыпе, адукацыя дазваляе мне быць дырэктарам альбо менеджэрам на любым прадпрыемстве. Так что магу не абмяжоўваць сябе ў выбары”.

Некалькі гадоў палкоўнік Падабед знаходзіўся ў спісе “неўязных” у краіны Еўрасаюза і ЗША за жорсткія разгоны акцый пратэсту супраць фальсіфікацыі вынікаў выбараў і рэферэндуму ў 2004 годзе.

Дагэтуль палкоўніка вельмі нядобрым словам успамінаюць шматлікія апазіцыянеры, якіх хапалі падчас вулічных акцый байцы Падабеда.

У 2006 годзе пасля прэзідэнцкіх выбараў Юрый Падабед быў узнагароджаны ордэнам “За службу Радзіме” III ступені.

Юрый Падабед жанаты другі раз. Мае двух дарослых сыноў ад першага шлюбу і дачку ад другога.