Лён, як бульба, — наша ўсё!

Источник материала:

Паводле ягоных слоў, каб трапiць на канцэрт у амфiтэатр, фактычна прыйдзецца тры разы прайсцi кантроль. Наогул у фестывальны цэнтр нельга праходзiць з вялiкiмi торбамi, напоi павiнны быць у празрыстай тары аб'ёмам да 0,5 лiтра, тэтрапакеты з сокамi таксама такiх жа аб'ёмаў...

Разам з мiлiцыянерамi ў форме за парадкам будуць сачыць iх калегi ў цывiльным. Такая практыка сябе апраўдала падчас "базару" летась. Патрульныя будуць з сабакамi Дэпартамента "Ахова" i вайсковай часцi — яны будуць выяўляць наркотыкi, выбуховыя рэчывы.

Як i летась, фестываль пройдзе пад знакам цвярозасцi. У радыусе 500 метраў ад фестывальных падзей нельга будзе купiць спiртное, уваход у "зоны бяспекi" нават з пiвам забаронены. Што датычыцца рэстаранаў i кавярняў, i там "нальюць" толькi тым, хто раней заказаў правядзенне "вечароў" i гэтак далей.

Наконт аховы "зорак". Ва ўсiх гатэлях кругласутачна выходзяць на дзяжурства мiлiцыянеры. Як адзначылi ва УУС, нiхто з дырэктараў не звяртаўся з просьбамi ахоўваць iх "зорак", бо ў кожнай "зоркi" ёсць свае ахоўнiкi. Калi ўсё-такi спатрэбiцца, будуць заключаны адпаведныя дагаворы на платнай аснове. Па традыцыi, мужныя амапаўцы створаць "калiдоры" для праходу знакамiтасцяў да грымёрак амфiтэатра i далей.

А вось дзяўчат — рэгулiроўшчыц дарожнага руху сёлета на фестывалi не будзе. Як пажартаваў адзiн "iнфарматар" ад мiлiцыi, амаль усе зацяжаралi, знаходзяцца ў дэкрэтных водпусках. I з'явяцца "фестывальныя" дзецi...

У цэнтры горада ўсталявалi яшчэ больш камер вiдэаназiрання. Дарэчы, i побач з КПП мiлiцыянеры будуць здымаць усiх, хто ўваходзiць, каб потым у выпадку чаго можна было б лёгка "вылiчыць" падазроных ва ўчыненнi злачынстваў. Колькасць мiлiцыянераў, якiя будуць ахоўваць фестывальны горад, трымаюць у сакрэце. Толькi адзначаецца, што i з другiх рэгiёнаў прыбылi мiлiцыянеры. А за парадкам на дарогах будзе таксама сачыць вядомае падраздзяленне "Страла".

Упершыню падчас "базару", лiтаральна на наступны дзень пасля яго афiцыйнага адкрыцця, пройдзе ўнiкальны фестываль "Вiцебск. Феерыя лёну".

Як расказала "Звяздзе" аўтар iдэi правядзення гэтага фестывалю пiяр-менеджар асацыяцыi "Вiцебск i кампанiя" Таццяна Лапiна, у цэнтры горада — насупраць папулярнага сярод "зорак" гатэля "Эрыдан", прама на вулiцы арганiзуюць паказ адзення, зробленага з лёну, сувенiраў. I прама на месцы ўсе ахвотныя змогуць купiць тое, што iм спадабаецца.

У праграме фестывалю таксама дзiцячае свята ў заапарку. Тут хлопчыкi i дзяўчаткi змогуць памаляваць на льняных тканiнах, паўдзельнiчаць у конкурсах. Арганiзуюцца латарэi. Iльняное чаяпiцце i такi ж абед таксама заяўлены ў праграме першага льнянога фестывалю. Падчас iх спецыяльна запрошаныя госцi змогуць ацанiць не толькi смачныя стравы, але i асабiста ўпэўнiцца, што льняныя вырабы — вельмi добры аксесуар для сервiроўкi сталоў.

У найблiжэйшых планах — арганiзацыя спецыяльных тураў для замежнiкаў. Яны змогуць арганiзавана прыехаць у Вiцебск i наведаць розныя паказы, прэзентацыi льняных вырабаў. Нават iльняны карнавал (аналаг знакамiтага бразiльскага) абавязкова пастараюцца арганiзаваць.

На жаль, сёння ў беларускiх крамах вырабы з лёну — рэдкасць. Праблема вырашыцца ў "культурнай сталiцы", калi ў Вiцебску адкрыецца фiрмовая крама аршанскага льнокамбiната. Тут будзе створаны i музей, дзе можна будзе ўбачыць традыцыйныя прадметы працы для перапрацоўкi лёну i нават паглядзець фiльм па тэме. Кiно раскажа пра гiсторыю льняной вытворчасцi, на кадрах будуць фрагменты таго, як лён расце, як потым збiраюць ураджай, як лён пераўтвараецца ў адзенне, сувенiры. Акрамя ўсяго, "творчы цэнтр" пры краме стане генератарам розных iдэй. Тут змогуць аб'яднацца мастакi i дызайнеры, усе прыхiльнiкi лёну...

— На Захадзе льняныя вырабы вельмi дарагiя, — расказвае Таццяна Лапiна. — Людзi там вельмi цэняць iльняныя тканiны, бо добра ведаюць, што лён вельмi карысны для здароўя. Мы ж пакуль што не вельмi цэнiм тое багацце, якое ў нас ёсць. Лён цесна звязаны з гiсторыяй i традыцыямi беларускага народа. На льняную тканiну калiсьцi прымалi дзiця i на ёй у апошнi шлях праводзiлi нябожчыка. Калi дзiця дрэнна спiць, можна пакласцi яму льняную цацку з травамi ўнутры. Менавiта так рабiлi нашы продкi. Лён павiнен стаць такiм жа "сiмвалам" Беларусi, як i бульба. I мы — энтузiясты, пры падтрымцы мясцовых уладаў ужо робiм многае, каб так i было насамрэч...

— Наш гатэль усяго толькi на 25 нумароў, — расказвае генеральны дырэктар гатэля "Эрыдан" Аляксандр Ходасаў. — Параўнальна невялiкi i ўтульны. Кожны нумар не падобны на iншы. Гасцям гэта падабаецца. Бо на адным "базары" можна жыць у адным нумары, на наступным — у iншым. Хоць некаторыя нумары "замацаваныя" за канкрэтнымi зоркамi... Напрыклад, Бабкiнай.

Сёлета ў "Эрыдане" будуць жыць кампазiтар Райманд Паўлс, Лайма Вайкуле, Пахмутава з Дабранрававым, паэт Еўтушэнка, усе тэатральныя "зоркi". Барыс Маiсееў неяк папрасiўся з чатырохзорнай "Лучосы" пасялiцца ў "Эрыдане". Цяпер ён — традыцыйны жылец.

Калi дырэктар вадзiў па калiдорах i паказваў нумары, я звярнуў увагу на тое, што ў калiдорах на стэлажах стаяць рэдкiя цяпер кнiгi — працы Ленiна з поўнага збору, гiсторыя КПСС... Дызайнер гатэля — чалавек з гумарам. Ды яшчэ i з фантазiяй. У нумарах, напрыклад, сталы зробленыя на "каркасе" швейных машынак, самыя розныя старыя прадметы быту iдэальна ўпiсваюцца ў iнтэр'ер. Каб купiць рарытэтныя прадметы, спецыяльна даюцца аб'явы ў СМI. Ёсць стары самавар — нясiце.