...

Источник материала:

 Паведамiць пра дзедаўшчыну зараз можна на сайце Генпракуратуры Беларусi. Для павышэння эфектыўнасцi барацьбы з магчымымi негатыўнымi праяўленнямi на афiцыйным сайце Генеральнай пракуратуры (www.prokuratura.gov.by) адчынены спецыяльны раздзел "За законнасць у войсках". Наведвальнiкам гэтага сайта прапануецца накiроўваць свае паведамленнi аб супрацьпраўных праяўленнях на электронны адрас пошты VTO2009@MAІL.RU або iнфармаваць па тэл. 203-59-36, 203-79-86. Пасля праверкi звестак iм будзе дадзена належная прававая ацэнка.

 У Слаўгарадскiм раёне загiнула 4-гадовая дзяўчынка, якая знаходзiлася ў дзiцячым садку. Дзiця гуляла ў альтанцы на тэрыторыi садка ў вёсцы Лапацiчы, заблыталася ў вяроўцы, што вiсела, i загiнула. Усё адбылося за лiчаныя хвiлiны, пакуль выхавальнiца па нейкiх прычынах адсутнiчала. У дачыненнi да выхавальнiцы ўзбуджана крымiнальная справа.

 Жыхар Аршанскага раёна i пастаўчанiн сталi ахвярамi вогнiшча купальскай ноччу. У Паставах 33-гадовага мужчыну, што скокнуў у вогнiшча, з агню дасталi супрацоўнiкi РАНС. З апёкамi 2-й i 3-й ступеняў ён быў накiраваны ў бальнiцу. Не пераадолеў вогненную перашкоду i пастух СВК "Купалаўскi" Аршанскага раёна. З апёкамi твару, грудной клеткi i дыхальных шляхоў ён таксама трапiў у бальнiцу.

 Наркагандлярка з вёскi Бордзiлы Чавускага раёна прыгаворана судом да пазбаўлення волi на 8 гадоў. Летам мiнулага года яна стала збiраць дзiкарослы мак у суседнiх вёсках i арганiзавала продаж высушанай макавай саломкi знаёмым. У яе доме знойдзена больш за 3 кг высушанага зелля.

 У нямецкiм Кёльне невядомыя абрабавалi фармацэўтычны завод канцэрна Bayer, скраўшы 320 тысяч таблетак ад iмпатэнцыi "Лявiтра". Рынкавы кошт скрадзеных прэпаратаў складае 5 млн еўра. Чацвёра злачынцаў непрыкметна зрабiлi лаз у агароджы i пралезлi на тэрыторыю завода. Зараз прадстаўнiкi правапарадку чакаюць з'яўлення таблетак на чорным рынку. Менавiта гэтыя лекi лiчацца самымi паспяховымi прэпаратамi Bayer. Летась канцэрн зарабiў на iх 341 млн еўра.