Махляр, а па сумяшчальнiцтве — дырэктар

Источник материала:

Як нас дураць

Па ўсёй Беларусi "наслядзiў", выкарыстоўваючы мудрагелiстыя схемы i залiшнi давер партнёраў, 46-гадовы махляр, а "па сумяшчальнiцтве" — дырэктар таварыства з абмежаванай адказнасцю. Доўгi час яму ўдавалася, як кажуць, выходзiць сухiм з вады, аднак у Ваўкавыскiм раёне, паведамляе ўпраўленне iнфармацыi i грамадскiх сувязяў УУС Гродзенскага аблвыканкама, нячысты на руку бiзнэсмен ўсё ж трапiў у поле зроку праваахоўнiкаў i быў узяты пад варту.

Паводле iнфармацыi начальнiка аддзела па барацьбе з карупцыяй i эканамiчнымi злачынствамi Ваўкавыскага РАУС маёра мiлiцыi Максiма Парышкуры, яшчэ на пачатку сваёй прадпрымальнiцкай дзейнасцi гэты мiнчанiн, будучы заснавальнiкам адной з камерцыйных структур, зарэкамендаваў сябе чалавекам з сумнеўнай рэпутацыяй, з-за чаго была накладзена забарона на яго ўдзел у статутных фондах арганiзацый розных формаў уласнасцi. Але што з гэтага? Мужчына стаў... скупляць фiрмы, мiнуючы вызначаныя законам абмежаваннi, а ў якасцi заснавальнiкаў за невялiкае ўзнагароджанне выступалi падстаўныя асобы. Увагнаўшы ў даўгi чарговую камерцыйную структуру, махляр браўся за наступную.

З 2007 года махляр прычынiў эканамiчныя страты шэрагу прадпрыемстваў, у тым лiку i Ваўкавыскага раёна. На адным з iх, да прыкладу, прадпрымальнiк узяў станок з намерам зрабiць яго рамонт па iстотна завышаных цэнах з наступным "адкатам" свайму контрагенту. А ў Лiдзе назваўся службовай асобай iншай фiрмы i махлярскiм шляхам завалодаў дзвюма сеялкамi (кошт тэхнiкi склаў каля 40 мiльёнаў рублёў), якiя затым апынулiся ў Гомельскай вобласцi.