Беларусь часова забаранiла ўвоз свiнiны з Лiтвы

Источник материала:

Сітуацыя

Галоўнае ўпраўленне ветэрынарыi з Дзяржаўнай ветэрынарнай i Дзяржаўнай харчовай iнспекцыямi Мiнiстэрства сельскай гаспадаркi i харчавання Беларусi з 13 лiпеня 2009 года да высвятлення эпiзаатычнай сiтуацыi ў Лiтве часова забараняе ўвоз у Беларусь жывых свiней, спермы кныроў, свiнiны i прадуктаў яе перапрацоўкi з Лiтоўскай Рэспублiкi ў сувязi з выяўленнем выпадку класiчнай чумы свiней. Аб гэтым карэспандэнту БЕЛТА паведамiла прэс-сакратар Мiнiстэрства сельскай гаспадаркi i харчавання Дар'я Казлоўская.

Прыпыняюцца дзеяннi раней выдадзеных дазволаў на ўвоз вышэйназваных тавараў. Забараняецца ўвоз названай прадукцыi ў паштовых пасылках i ручной паклажы пасажыраў. Гэтыя дзеяннi з беларускага боку прыняты на падставе пiсьма Дзяржаўнай харчовай i ветэрынарнай службы Лiтоўскай Рэспублiкi.

У Паневяжыскiм раёне Лiтвы на свiнаферме Pasodele, якая належыць дацкай кампанii, зарэгiстравана ўспышка свiной чумы. Дзяржаўная харчовая ветэрынарная служба Лiтвы паведамiла, што пасля лабараторнага пацвярджэння захворвання на свiную чуму была накладзена часовая забарона на вываз свiней з тэрыторыi Лiтвы. Аб выпадку захворвання праiнфармаваны Еўрапейская камiсiя i суседнiя краiны. Аб'яўлены каранцiн, прымаюцца ўсе меры, каб не дапусцiць распаўсюджвання захворвання. На фермах Pasodele знiшчаны 445 свiней, завезеных у Лiтву з Данii, праведзена дэзынфекцыя.

Праведзены агляд усiх свiнагадоўчых комплексаў, што знаходзяцца непадалёк, праходзяць лабараторныя даследаваннi: аналiзы на чуму бяруць у свiней i дзiкоў, што насяляюць наваколле Паневяжыса. Свiная чума не ўяўляе небяспекi для людзей. Заражэнне зарэгiстраваным у Паневяжыскiм раёне тыпам вiруса не назiралася ў Еўропе ўжо 9 гадоў. У 2007 годзе такi вiрус, што выклiкае свiную чуму, быў зарэгiстраваны ў краiнах Азii i Паўднёвай Афрыкi.