Першы базарны iнвестыцыйны форум

Источник материала:

У Вiцебску падчас мiжнароднага фестывалю мастацтваў упершыню праходзiць мiжнародны iнвестыцыйны форум. Iдэя яго правядзення належыць старшынi Вiцебскага аблвыканкама Аляксандру Косiнцу. Ён павiншаваў усiх удзельнiкаў, якiм улады абяцаюць падтрымку ва ўсiх цiкавых прапановах.

Нагадаю, што па iнiцыятыве губернатара аналагiчны маштабны форум адбыўся сёлетняй вясной. На iм былi прадстаўлены 150 iнвестыцыйных прапаноў на агульную суму каля мiльярда рублёў, з якiмi пазнаёмiлiся бiзнэсмены з 20 краiн. У вынiку былi заключаны дагаворы i пагадненнi на 350 мiльёнаў долараў.

Цяпер чакаецца, што "базарны" форум будзе яшчэ больш прадукцыйным. Лепшага часу, чым на "базары", для бiзнэс-сустрэч i прыдумаць нельга. Патэнцыйныя iнвестары могуць на свае вочы ўбачыць, як насычаны правiнцыйны горад рознымi падзеямi, упэўнiцца, як выгадна можна было б укласцi грошы ў развiццё турыстычнага i гасцiнiчнага бiзнэсу, пункты харчавання i гэтак далей. Хоць, канешне, мясцовыя ўлады зацiкаўленыя ў iнвестыцыях у рэгiён у цэлым.

Сярод усяго iншага дзелавым людзям прапануецца ўкласцi грошы ў стварэнне вiцебскага парка забаў — аналаг Дыснэйлэнда. Пры гэтым будаўнiчыя работы ажыццявяць тутэйшыя спецыялiсты. Спадзяюцца знайсцi iнвестараў i для будаўнiцтва гасцiнiчных комплексаў у Вiцебску i Полацку. I вiцебскаму гатэлю з аднайменнай назвай ужо даўно патрабуецца рэканструкцыя.

Прыярытэтны iнвестыцыйны праект — стварэнне сучаснага транспартна-лагiстычнага цэнтра ў раёне вiцебскага аэрапорта. Мяркуецца выкарыстанне аэрапорта, што мае сертыфiкат мiжнароднага ўзроўню, для ажыццяўлення транзiтных пералётаў з Iталii ў Маскву i Пiцер. А пад Оршай, у пасёлку Балбасава, плануюць стварыць базы для размяшчэння малой авiяцыi — самалётаў i верталётаў са сталiцы Расii.

Яшчэ наконт глыбiнкi. Ёсць прапанова адкрыць у Глыбоцкiм раёне вытворчасць натуральных вiнаградных вiнаў i каньяку, а ў Паставах — прадпрыемства па вырабе сучасных матэрыялаў з адходаў дрэваапрацоўкi.