На конкурсе Мiсiс свету-2009 Беларусь прадставiць Васiлiна Калугiна

Источник материала:

Для 26-гадовай мiнчанкi гэта ўжо не першы вопыт удзелу ў конкурсах прыгажосцi — у 2006 годзе на конкурсе "Мiс Беларусь" яна заваявала тытул "Мiс прэса", дзякуючы чаму неўзабаве стала прэс-сакратаром тэлеканала СТБ.

Цяпер у Васiлiны i статус iншы — замужняя жанчына, мацi гадавалага сына, i пасада таксама — пасля нараджэння дзiцяцi яна перайшла ў рэкламную дырэкцыю канала. Нязменным засталося толькi жаданне "знайсцi сябе" i паспрабаваць свае сiлы зноў, няхай i ў iншых конкурсах. Запоўнiла анкету на сайце "Мiс свету", даслала фота. Пасля кастынгу ў Лiтве, дзе знаходзiцца прадстаўнiцтва конкурсу, кандыдатуру Васiлiны зацвердзiлi, абраўшы яе сярод 10 iншых прэтэндэнтак, i цяпер беларуска пакрысе збiрае чамаданы. Прычым не на адзiн конкурс, а адразу на тры! 1 жнiўня ў Рызе адбудзецца конкурс "Мiсiс Юнiверсал-2009", у лiстападзе ў В'етнаме збяруцца ўдзельнiцы конкурсу "Мiсiс свету", а ў студзенi ў Славенii пройдзе "Мiсiс Глобал-2009". Аб'ядноўвае гэтыя спаборнiцтвы прыгажуняў адно патрабаванне: канкурсанткi абавязкова павiнны быць замужам, а наяўнасць дзяцей узмацняе шанцы на перамогу. У конкурсе "Мiсiс свету-2009", якi праводзiцца ўжо 30 гадоў, акрамя таго таксама моцны дабрачынны складнiк: хоць пераможца i атрымае грашовы прыз, аднак пасля таго цягам года жанчына абавязана бясплатна ездзiць па розных краiнах з дабрачыннымi мiсiямi — наведваць бальнiцы, шпiталi, дзiцячыя дамы i г.д.

Супернiц Васiлiна Калугiна спадзяецца пераўзысцi "натуральнай прыгажосцю" — бо не сакрэт, што мноства ўдзельнiц конкурсаў прыгажосцi карыстаюцца паслугамi пластычных хiрургаў. А суддзяў маладая жанчына гатовая здзiвiць адметным танцавальным нумарам — усё ж па адукацыi яна харэограф.