"Палiмiр" не мае дачынення да ўцечкi хiмiкатаў у Рыжскiм порце

Источник материала:

Да ўцечкi хiмiкатаў у Рыжскiм порце беларускi завод "Палiмiр" не мае дачынення. Пра гэта заявiлi на прадпрыемстве.

Наваполацкi завод "Палiмiр" ААТ "Нафтан" у адпаведнасцi з кантрактам адправiў латвiйскай фiрме Biоlаr ацэтонцыянгiдрын у цыстэрнах. "Прадукт быў дастаўлены з Наваполацка ў цыстэрнах на станцыю прызначэння — Олайне (горад пад Рыгай). З нашага боку была забяспечана пастаўка якаснага прадукту ў нармальных цыстэрнах. Усе свае абавязкi перад Biоlаr мы выканалi, i пытанняў нiякiх не ўзнiкла", — падкрэслiлi на "Палiмiры".

Як паведамлялася, у ноч на 23 лiпеня ў адным з кантэйнераў у Рыжскiм порце пачалася некантралюемая рэакцыя хiмiчных рэчываў, у вынiку чаго адбылася ўцечка ацэтонцыянгiдрыну — бясколернага рэчыва, якое з'яўляецца вельмi таксiчным. Работнiкi порта выявiлi ўцечку толькi ранiцай. Усю ранiцу пажарныя ахалоджвалi кантэйнер i спрабавалi збiць цiск унутры яго. Жыхары блiзкiх раёнаў латвiйскай сталiцы былi эвакуяваныя. Пашкоджаны кантэйнер паспяхова вывезены за межы Рыгi i дастаўлены ў горад Олайне на прадпрыемства Biоlаr, якое з'яўляецца ўласнiкам таксiчнага рэчыва.

У Дзяржаўнай пажарна-выратавальнай службе Латвii паведамiлi, што верагоднай прычынай уцечкi ядавiтага рэчыва ацэтонцыянгiдрыну ў Рыжскiм порце з'яўляецца непрамыты кантэйнер. Разам з тым кiраўнiцтва прадпрыемства Biоlаr заявiла прэсе, што кантэйнер, з якога адбылася ўцечка таксiнаў, прыйшоў з беларускага Наваполацка, з прадпрыемства "Палiмiр".