Аптымiзацыя АПК Беларусi будзе прадоўжана за кошт узбуйнення гаспадарак

Источник материала:

Аптымiзацыя АПК Беларусi будзе прадоўжана за кошт узбуйнення гаспадарак

Аптымiзацыя аграпрамысловага комплексу Беларусi будзе прадоўжана за кошт узбуйнення гаспадарак, аднак гэты працэс павiнен праходзiць натуральным шляхам. Аб гэтым заявiў 8 жнiўня Прэзiдэнт Беларусi Аляксандр Лукашэнка, наведваючы СВК "Астрамечава" Брэсцкага раёна.

У другі дзень рабочай паездкi па рэгiёнах краiны Прэзiдэнт пабываў у адным з буйных прадпрыемстваў Брэсцкага раёна — СВК "Астрамечава". Аляксандр Лукашэнка адзначыў, што ў Беларусi ёсць узоры гаспадарак, па якiх трэба выбудоўваць работу ўсiх сельгаспрадпрыемстваў. "У нас ужо ёсць маса такiх узорных гаспадарак, на якiя нам трэба арыентавацца ў плане структуравання зямельных угоддзяў, тэхналогiй, дысцыплiны i iншага", — сказаў кiраўнiк дзяржавы, у якасцi аднаго з паказальных прыкладаў прывёўшы гаспадарку СВК "Астрамечава", якую ён наведваў.

Прэзiдэнт падкрэслiў мэтазгоднасць паступовага ўзбуйнення гаспадарак у раёнах. Аптымальны памер гаспадаркi, з яго пункту гледжання, каля 10 тыс. га. "Аднак штучна заганяць усiх у буйныя гаспадаркi нельга. Я катэгарычны працiўнiк штучнага ўзбуйнення: калi нейкая невялiкая гаспадарка працуе прыбыткова, то няхай так i застаецца", — сказаў ён. Напрыклад, аграпрам Брэсцкага раёна, паводле слоў Аляксандра Лукашэнкi, "структураваны як належыць", а таму "трэба iсцi ў iншыя раёны i глядзець, што трэба зрабiць там". Беларускi лiдар прызнаўся, што раней аддаваў перавагу варыянту невялiкiх маштабаў гаспадарак (каля 5 тыс. га). "Але цяпер, калi мяняюцца тэхналогii, трэба па-iншаму ставiцца да дысцыплiны, трэба лiчыць грошы, малыя гаспадаркi не заўсёды спрацоўваюць эфектыўна. Патрэбны буйныя гаспадаркi", — падкрэслiў Прэзiдэнт. Ён дадаў, што яшчэ адным фактарам, якi пераконвае ў неабходнасцi ўзбуйнення, з'яўляецца тое, што ўсё больш сельскiх жыхароў ад'язджаюць у аграгарадкi i гарады. "Мы не памылiмся з узбуйненнем, калi толькi не будзем праводзiць яго штучна", — яшчэ раз падкрэслiў кiраўнiк дзяржавы. "Будзем ствараць вялiкiя комплексы зямлi i ўладкоўваць на iх вытворчасць", — дадаў ён.

Паводле слоў кiраўнiка дзяржавы, сёння ёсць розныя варыянты мадэляў эфектыўнага ўладкавання сельскагаспадарчых прадпрыемстваў. Ён таксама нагадаў сваё патрабаванне, што сучасныя тэхналогii павiнны ўкараняцца паўсюдна, а не толькi ў асобных гаспадарках.

У час наведвання Брэсцкага раёна Аляксандр Лукашэнка таксама закрануў пытанне тэхналогiй утрымання буйной рагатай жывёлы. У прыватнасцi, выпас малочнага статка павiнен быць зведзены да мiнiмуму, а выпас мясных парод жывёлы ажыццяўляцца пераважна на непрыдатных землях пры пойменных участках i лугавых палях.

Прэзiдэнт чарговы раз акцэнтаваў увагу на тым, што ў будучай пяцiгодцы неабходна адыходзiць ад датавання сельскай гаспадаркi. "Мы будзем дапамагаць гаспадаркам толькi па сутнасцi. Дзяржава павiнна займацца сваiм колам пытанняў: зямля, дарогi, сацыяльная сфера. А вытворчая сфера — гэта справа кiраўнiкоў прадпрыемстваў".

У цэнтры ўвагi Аляксандра Лукашэнкi знаходзiлiся i пытаннi арганiзацыi работ па сушцы, дапрацоўцы, захоўваннi збожжа i падрыхтоўцы насеннага матэрыялу. У краiне дзейнiчае 3,3 тыс. зернесушыльных комплексаў i 2,3 тыс. асобных невялiкiх сушылак. У гэтым годзе ўведзены ў строй 104 комплексы. У суткi перапрацоўваецца 600 тыс. тон збожжа, вiльготнасць якога складае не больш як 20 працэнтаў. Кiраўнiку дзяржавы было даложана аб ходзе выканання праграмы мадэрнiзацыi зернесушыльных комплексаў у гаспадарках Брэсцкай вобласцi.

Брэсцкi губернатар Канстанцiн Сумар у размове з Прэзiдэнтам узняў пытанне аб селекцыi. Ён адзначыў, што тэрмiн выпрабавання выведзеных сартоў насення цяпер у Беларусi вельмi вялiкi — 4-5 гадоў, а поўны цыкл селекцыi складае 9-10 гадоў. З-за гэтага айчыннае раслiнаводства вымушана адставаць ад замежнага па тэмпах асваення новых сартоў. У сувязi з гэтым старшыня аблвыканкама прапанаваў выкарыстоўваць у севазвароце тыя распрацаваныя сарты, якiя пакуль не прайшлi ўсю працэдуру выпрабаванняў, — гэта зэканомiць час. Неабходнасць скарачэння тэрмiнаў прызнаюць i беларускiя вучоныя. Разам з тым ёсць небяспека таго, што скарачэнне перыяду навукова-даследчых работ па вывядзеннi i ўкараненнi новых сартоў збожжавых культур можа прывесцi да пэўных негатыўных наступстваў. У гэтай сiтуацыi кiраўнiк дзяржавы лiчыць неабходным эксперыментальным шляхам выйсцi на вырашэнне гэтай праблемы. Ён таксама падкрэслiў, што тэхналогii селекцыi насення ў Беларусi неабходна паляпшаць.

Прэзiдэнт наведаў у СВК "Астрамечава" зерняток, малочна-таварную ферму. Аляксандр Лукашэнка застаўся задаволены ўбачаным i даў высокую ацэнку рабоце брэсцкiх аграрыяў.