Беларусь пачне запрашаць міжнародных наглядальнікаў пасля рэгістрацыі кандыдатаў у прэзідэнты — Ярмошына

Источник материала:

Беларусь пачне запрашаць міжнародных наглядальнікаў пасля рэгістрацыі кандыдатаў у прэзідэнты. Аб гэтым паведаміла журналістам старшыня ЦВК Лідзія Ярмошына.

Каменціруючы праведзеную ў кіраўніка дзяржавы нараду, на якой у тым ліку абмяркоўвалася тэматыка арганізацыі выбараў, Лідзія Ярмошына адзначыла, што гэта мерапрыемства было традыцыйным. Паводле яе слоў, у перыяд правядзення выбарчай кампаніі заўсёды ёсць пытанні, якія патрабуюць вырашэння на вышэйшым узроўні.

«Адно з пытанняў, якое абмяркоўвалася на пасяджэнні, — назіранне за выбарамі з боку замежных арганізацый і міжнародных экспертаў. Гэта наша звычайная практыка: усе выбары ў краіне праходзяць пры шырокім міжнародным назіранні, — прывяла прыклад старшыня ЦВК. — Выпрацоўваецца алгарытм дзеянняў для запрашэння міжнародных наглядальнікаў. Было прынята рашэнне, што па меры паляпшэння эпідэміялагічнай абстаноўкі ў краіне Міністэрствам замежных спраў будуць накіраваны адпаведныя запрашэнні ў міжнародныя арганізацыі, якія традыцыйна назіраюць за нашымі выбарамі: гэта БДІПЧ АБСЕ і СНД. Аднак адбудзецца гэта, я думаю, пасля завяршэння працэсу рэгістрацыі кандыдатаў у прэзідэнты. Спадзяюся, да гэтага моманту эпідэміялагічная абстаноўка палепшыцца».

На нарадзе таксама абмеркавалі работу інфармацыйнага цэнтра, які традыцыйна ствараецца ў дзень выбараў на пляцоўцы Палаца Рэспублікі, аказанне практычнай дапамогі Цэнтрвыбаркаму: камісіі спатрэбяцца дадатковыя супрацоўнікі для арганізацыі работы са зваротамі грамадзян. Дапамогу тут акажуць прадстаўнікі парламента і Нацыянальнага цэнтра заканадаўства і прававых ініцыятыў.

Акрамя таго, паводле слоў Лідзіі Ярмошынай, Аляксандр Лукашэнка арыентаваў ЦВК працаваць як мага ўважлівей, каб сабраныя прэтэндэнтамі ў кандыдаты подпісы не прызнаваліся несапраўднымі па фармальных абставінах. «Думаю, такія меры будуць садзейнічаць таму, што ўсе электаральныя запатрабаванні будуць улічаны ў працэсе рэгістрацыі кандыдатаў у прэзідэнты і, зразумела, у дзень галасавання», — сказала старшыня Цэнтрвыбаркама.