З новым класам!

Источник материала:

У Кішынёве пачынае працаваць беларуская нядзельная школа
Адкрыццё беларускай нядзельнай школы ў замежжы — яскравы паказчык і моцы суполкі, і дзейснага патрыятызму яе сяброў. Нашы суайчыннікі ў Малдове цэлы год рабілі ўсё, каб наблізіць радасны момант. Савету Беларускай грамады ў Рэспублiцы Малдова на чале з Юрыем Статкевічам давялося пастарацца: памяшканне, фінансаванне, выкладчыкі, падручнікі, вучэбныя планы… “Са студзеня ў нас запрацуе нядзельная школа, будуць праводзіцца заняткі па вывучэнні беларускай мовы і літаратуры, урокі па культуры i гiсторыi Беларусi, — паведаміў у рэдакцыю Юрый Статкевіч. — У снежні на пасяджэннi Рады мы падвялiся вынiкi падрыхтоўчай работы, зацвердзiлi выкладчыкамі Ганну Вайняровiч-Мазур і Кацярыну Кухалюк. Плануем, што на першым часе ў школе будзе навучацца 15–20 вучняў, у асноўным старэйшых класаў, арганізуем і заняткi для дарослых”.
Тут да месца будзе нагадаць: у вну Беларусі вучацца дзясяткі беларусаў замежжа. У адпаведнасці з заканадаўствам суайчыннiкi з iншых краiн, якія паступаюць па рэкамендацыях беларускiх суполак ці навучальных устаноў замежжа, пры атрыманнi станоўчых ацэнак на ўступных iспытах па ўсiх формах навучання залiчваюцца ў вну па-за конкурсам, на спецыяльна вылучаныя месцы. Да таго ж абітурыенты маюць права выбіраць: здаваць уступныя іспыты на беларускай ці на рускай мове. Таму такія нядзельныя школы — гэта яшчэ і добрая падтрымка для тых, хто жадае ў будучыні атрымаць вышэйшую адукацыю ў Беларусі, звязаць з ёй свой лёс.
Пра тое, што беларусы ў Малдове не забываюць родную мову, літаратуру, сведчыць і праведзеная суполкай вечарына, прысвечаная 80-годдзю Уладзіміра Караткевiча. Цікава расказаў пра жыццё і творчасць пісьменніка ўраджэнец Лоеўшчыны, выпускнік Беларускага тэатральна-мастацкага інстытута, мастак Вячаслаў Ігнаценка. А Мiкалай Шляпо, Iван Рахуба, Вера Сугак чыталі свае вершы.

Пётр Арэшка