Зорка польскай літаратуры ў Мінску і Гродне

Источник материала:

Да нас едзе Вольга Такарчук, сучасная польская пісьменніца, адна з найважнейшых постацяў у сучаснай еўрапейскай раманістыцы, роўна любімая як літаратурнымі крытыкамі, так і шырокай чытацкай публікай.

Вольга Такарчук едзе ў Беларусь нездарма. У Мінску ў выдавецтве «Логвінаў» у перакладзе на беларускую выйшаў яе раман «Правек да іншыя часы», які лічыцца адной з вяршыняў польскай міфатворчай прозы, польскай версіяй магічнага рэалізму.

Убачыць жывую легенду сучаснай літаратуры, пачуць урыўкі з яе твораў і задаць ёй пытанні можна будзе на вечарыне, прысвечанай выхаду беларускага перакладу. Вечарына Вольгі Такарчук адбудзецца 12 кастрычніка ў Дзяржаўным Музеі гісторыі беларускай літаратуры (Траецкае прадмесце, Багдановіча 13, ст.м. «Няміга»). Пачатак а 17–30.

Акрамя аўтаркі і яе беларускай перакладчыцы, Марыны Шоды, чытаць выбраныя месцы з раману на вечарыне будзе заслужаная артыстка Беларусі Зоя Белахвосцік, а музычна аздобіць сустрэчу этна-джазавы гурт АКАNA. Весці вечарыну будзе Андрэй Хадановіч.

Акрамя Мінска, Такарчук наведае таксама Гродна, дзе 13 кастрычніка, а 18 гадзіне выступіць у Гродзенскім Дзяржаўным Універсітэце.

Крыху пра творчасць Вольгі Такарчук. Ужо дэбютны твор Такарчук — раман «Падарожжа людзей Кнігі» (1993) быў высока адзначаны і крытыкамі, і чытачамі. Яе творчасць спалучае папулярнасць і добры густ, філасоўскую глыбіню і мастацтва аповеду. Раман Такарчук «Анна Ін у грабніцах свету» (2006) — футурыстычная, амаль кіберпанкаўская трактоўка вядомага шумерскага міфу пра сыход багіні Інанны ў падземны сьвет — быў напісаны як унёсак у міжнародны праект «Міфы», у якім бралі ўдзел таксама Маргарэт Этвуд, Віктар Пялевін, Джэнет Уінтэрсан і іншыя сусветна вядомыя пісьменнікі. Раман «Бегуны» (2007) — кніга пра феномен падарожжа, пры псіхалогію вандравання, пра з’яўленне новага народу, народу касмапалітаў — у 2008-м годзе быў ўганараваны самай вядомай польскай літаратурнай прэміяй «Ніка». На падставе яе твораў робяцца тэатральныя пастаноўкі і экранізацыі.