На Канскім кінафестывалі ўпершыню прадставяць павільён Беларусі

З 11 па 22 траўня ў Францыі адбудзецца 64-ы Міжнародны Канскі кінафестываль, на якім упершыню будзе прадстаўлены Нацыянальны павільён Беларусі. Пра гэта TUT.BY паведамілі ў Міністэрстве культуры.

Як распавялі ў Мінкульце мэтай прадстаўлення Нацыянальнага павільёна з’яўляецца пошук патэнцыяльных партнёраў і наладжванне ўзаемавыгадных кантактаў з прадстаўнікамі замежных кінавытворчых і кінапрадзюсарскіх кампаній, дасягненне дамоўленасцяў па рэалізацыі сумесных кінапраектаў.

Арганізатарамі павільёна з’яўляюцца Міністэрства культуры, Нацыянальная дзяржаўная тэлерадыёкампанія і Нацыянальная кінастудыя “Беларусьфільм”. Спонсарскую дапамогу ў арганізацыі павільёна акажуць кампанія “Бульбаш” і прадстаўніцтва “Пежо” у Беларусі.

“Рэалізацыя гэтага прэстыжнага для нашай краіны праекта будзе спрыяць пашырэнню супрацоўніцтва беларускіх кінематаграфістаў з еўрапейскімі кінапрадзюсарамі, наладжванню кантактаў у галіне кінематаграфіі з мэтай рэалізацыі сумесных кінапраектаў”, — адзначаюць у Мінкульце.