Высокая місія святара

Источник материала:

Спіс беларускіх святых папоўніўся імем свяшчэннапакутніка Кіпрыяна Клімуца, ураджэнца Гродзеншчыны
Акт кананізацыі адбыўся ў Свята-Міхайлаўскім кафедральным саборы ў Лідзе. Кіпрыян Клімуц, ураджэнец вёскі Альховы Гродзенскага павета, служыў святаром у межах цяперашняй Навагрудскай епархіі. Там гэта першы акт кананізацыі за апошнія 500 гадоў. Увогуле ж у Беларусі апошняя кананізацыя адбылася ў чэрвені мінулага года ў Полацку.
Дзевяцігадовае служэнне Кіпрыяна Клімуца ў розных прыходах епархіі і дзесяцігадовая дзейнасць на пасадзе настаяцеля храма Нараджэння Найсвяцейшай Багародзіцы ў вёсцы Ятра сталі прыкладам духоўнага подзвігу. У 1934 годзе пры храме святар утварыў Праваслаўнае народнае брацтва. Настаяцеля абвінавацілі ў антысавецкай агітацыі. Ён памёр у адным з лагераў ГУЛАГу ў 1942 годзе, а ў 1989-м быў рэабілітаваны. Урачыстае набажэнства і акт кананізацыі ў Лідскім храме ўзначаліў Патрыяршы Экзарх усяе Беларусі, Мітрапаліт Мінскі і Слуцкі Філарэт. Кіраўнік Беларускай праваслаўнай царквы падкрэсліў асаблівую значнасць свята для духоўнага жыцця народа. Дзень памяці гэтага святога будзе штогод адзначацца ў дзень яго смерці 9 верасня.
На ўрачыстае мерапрыемства прыбыў і праўнук Клімуца Цэзарый Цімошка, які сёння жыве ў польскім Шчэціне. Ён перадаў фотаздымкі з сямейнага архіва. Даследчыкі склалі жыццё святога Кіпрыяна, якое атрымалі ў падарунак удзельнікі ўрачыстасці — духавенства, прыхаджане і паломнікі.

Алена Стасюкевіч