Качаткоў зробіць з вас артыста

Источник материала:

Арганізатар сумеснага з “РГ” праекта “Напішам песню разам” прапаноўвае новыя ўмовы стварэння песні. Цяпер мы шукаем не толькі паэтаў, але і выканаўцаў.

Музыкант настойвае на тым, што праца над песняй − гэта стварэнне  прадукту. І ён хоча наладзіць яго вытворчасць.

− Добрая песня − сума прыгожай мелодыі, цікавага тэксту, цудоўнай аранжыроўкі і непапсовага выканання, − расказвае музыкант. − У выніку атрымліваем прыемны шансон. Тэксты пераважна на беларускай мове, некаторыя на рускай і англійскай.

Фармат прадукту Качаткова − канцэртная музыка, але ён будзе прасоўваць песні і ў радыёстанцыях. Музыкант падзеліцца сваім вопытам − за некалькі месяцаў ён стварыў песню, з якой удзельнічаў у “Еўрафэсце”. Цяпер яго “Flying like Ikarus” гучыць на пяці радыёстанцыях Беларусі.

Як будзе працаваць праект? Найперш спевакам неабходна павышаць узровень выканальніцкага майстэрства. А гэта − пастаянная праца. У Качаткова ўжо ёсць каманда − аранжыроўшчыкі, паэты, педагогі па вакале, неабходная апаратура.

Паводле слоў музыканта, добра зробленая песня абыходзіцца ў “кругленькую” суму − да 1000 долараў. Пакуль іх укладае толькі ён.

Качаткоў хацеў зрабіць “музычны прадукт”, і найпрасцей было самому.

− З кожнай новай песняй якасць працы была ўсё лепшая, − гаворыць музыкант. − Водгукі і спампоўванні з Інтэрнэта песні “Flying like Ikarus” вельмі радуюць. Мае песні круцяць па радыё, за іх галасуюць людзі, каб праслухаць яшчэ. А цяпер працую над тым, каб прыцягваць іншых папулярных артыстаў да праекта.

Качаткоў прапаноўвае дапамагчы любому пачынаючаму выканаўцу стварыць непаўторны, арыгінальны нумар, з якім той можа выступаць на канцэртах, удзельнічаць у конкурсах, прапаноўваць на радыё, а таксама прадстаўляць яго як узор пры пошуку прадзюсара.

Калі вы жадаеце стаць артыстам, пакіньце свае кантакты на сайце ў каментарах, ці напішыце на паштовую скрыню рэдакцыі (regionnews@rh.by).

Зоя ХРУЦКАЯ.

Чытайце яшчэ:

Слухайце онлайн калядны канцэрт ад Віталя Качаткова