"Бабулі паказалі, як трэба скакаць". У Гомелі прайшоў карагодны этнафэст

Источник материала:

Прыемна здзівіў Веткаўскі музей стараабрадніцтва і беларускіх традыцый імя Ф. Р. Шклярава ў мінулую нядзелю. Яго супрацоўнікі зладзілі шыкоўны этнафэст з удзелам фальклорных калектываў і лепшых гомельскіх гуртоў.




На працягу дня ў Цэнтральным парку гучалі беларускія песні. Пляцоўка каля філіяла музея была такой прывабнай і пазітыўнай, што нават выпадковыя мінакі, якія спыняліся паслухаць адну песню, забываліся на свае справы і заставаліся да сканчэння свята. Адкрытыя галасы ў адкрытай прасторы - гэта магія.





"Такога ў Гомелі яшчэ не было", - сказаў малады хлопец свайму сябру, які прытанцоўваў у такт музыцы. І сапраўды, такога маштабнага этнафэста з удзелам мясцовых гуртоў у горадзе раней не адбывалася. Этнакультура аб'яднала людзей усіх узростаў: тут былі дзеткі, падлеткі, юнакі і бабулі з дзядулямі. І ўсім было цікава разам, і надвор'е спрыяла.

- Дзень музеяў супадае якраз з такім святам, калі на Веткаўшчыне "Стралу" вадзілі, то бок з веснавымі карагодамі. Можа, сёння нам гэтыя карагоды дапамаглі хмары разагнаць, і вячэрні блок таксама адбыўся без дажджу, - усміхаецца загадчык філіяла Веткаўскага музея Пятро Цалка.





Арт-праект "Вокны" фатографа Алега Белавусава ўпрыгожваў будынак філіяла Веткаўскага музея: на вялікіх па памеры здымках адлюстраваны традыцыйныя беларускія абрады.

- Карагодны фэст адбываецца ў рамках Міжнароднага дня музеяў. Гэта быў трэці, завяршальны дзень "Ночы музеяў", - распавёў Пятро Цалка. - Першы блок свята - аўтэнтычна традыцыйны. Разам з намі святкавалі фальклорныя калектывы Веткаўскага, Гомельскага і Чачэрскага раёнаў. Яны паказалі веснавую традыцыю карагодаў, якая засноўвалася на абрадах "Страла" Веткаўскага раёна, "Сула" Гомельскага раёна. Жанчыны прадэманстравалі, як гэта адбывалася раней - і вакальна, і харэаграфічна. Дарэчы, яны паказалі вясёлую частку традыцыйнай культуры - танцы, прыпеўкі. Бабулі, нягледзячы на ўзрост, паказалі, як трэба скакаць - з задорам, з весялосцю, з бадзёрасцю.



На рамесніцкай пляцоўцы пад спевы можна было назіраць за ткацтвам дзяўчат з клуба "Параскева", за разьбой па дрэве гомельскага майстра-рэзчыка Барыса Васількова.




Да іх падыходзілі і людзі больш сталага ўзросту, затрымліваліся надоўга, было бачна, што яны ўспамінаюць сваё дзяцінства, калі гэтыя рамёствы былі яшчэ справай звычайнай.

Ну і самае галоўнае: выстава ў музеі працавала бясплатна, і людзі, якім раней нешта перашкаджала зайсці ў музей, з задавальненнем разглядалі экспазіцыі "Дорога длиною в 400 лет", "Жывое рамяство" + "рЭвалюцыя неглюбскага ручніка" і клуб "Параскева" і іншыя. Напачатку туды заходзілі па 5-6 чалавек, напрыканцы фэста жадаючых было так шмат, што выстрайвалася чарга. Працаваў музей да 23 гадзін.





Супрацоўнікі музея адзначылі, што фэст адбыўся і дзякуючы Юрыю Суліму. Дырэктар будаўнічай кампаніі "Лінія зносу" па сваёй дзейнасці далёкі ад культуры. Але бацька Суліма нарадзіўся ў Ветцы, і Юрый упэўнены, што нельга забывацца на свае карані.


- Гэты чалавек сапраўды разумее вартасць, гісторыю, культуру. Шмат культурных праектаў, якія ладзіць Веткаўскі музей, праходзяць пры яго падтрымцы, - распавялі яны.

Тым часам а 20-й гадзіне пачалася музычная праграма "Як пушчу стралу...". Публіка заўважна змянілася: людзей больш сталага ўзросту стала значна меней, затое прыйшла моладзь.

Гурт "Ягорава гара" спяваў больш лірычная песні.

Посмотреть видео (файл 15.3 МБ будет загружен на ваше устройство)

Пасля яго быў выступ фолк-фэнтэзі-гурта "Млын Сонца".





Калі на пляцоўцы з'явіўся acoustic-ethno-rock-jazz-гурт BIFOLK, слухачы ўжо былі добра разагрэтыя беларускімі песнямі - хлопалі і таньчылі на ўсю моц.





Трэба адзначыць, што ўсе тры гурты працуюць у фальклорным накірунку, апрацоўваючы традыцыйную культуру. Дзякуючы такім музычным праектам тое, што адышло з цягам часу, не ўспрымаецца сёння як архаіка. Наадварот, адчуваецца цесная сувязь паміж мінуўшчынай і сучаснасцю. Галоўнае, такая музыка падабаецца і старым, і малым.

Напрыканцы ўсіх чакала яркае відовішча - фаер-шоу тэатра агню Atesh, пасля якога фэст быў скончаны. Але ніхто не хацеў разыходзіцца. На пляцоўку зноў выйшаў гурт "Ягорава гара", і ўсе дружна спявалі разам вясёлую песню "Лёлі-лелі, каліна, лелі, ягада мая", якую вывучылі па ходзе. Дадому пачалі разыходзіцца, калі ў парку ўжо не гарэлі ліхтары.

Посмотреть видео (файл 4.9 МБ будет загружен на ваше устройство)