На адкрыццё дошкі Паўлу Масленікаву ў Віцебску сабраўся арт-бамонд з некалькіх гарадоў

Источник материала:

Дом №3 на вуліцы Суворава ў Віцебску называюць "будынкам з шыльдамі". На ім змешчана найвялікшая колькасць мемарыяльных дошак у горадзе. Сёння на ім з'явілася ўжо шостая па ліку - у гонар народнага мастака, мастацтвазнаўца і педагога Паўла Масленікава.




Дошку ўсталявалі ў сувязі са святкаваннем 100-годдзя з дня нараджэння мастака.

З Віцебскам Масленікава, які нарадзіўся на Магілёўшчыне, а жыў у Мінску, звязвала вучоба. У 1934-1938 гадах ён быў студэнтам Віцебскага мастацкага вучылішча. Дошка ў ягоны гонар змешчана на тым будынку, дзе знаходзілася гэта навучальная ўстанова.







Над вобразам мастака працаваў мінскі скульптар Павел Лук. Дошка ўяўляе сабой партрэт у прыгожай рамцы. Павел Масленікаў найперш вядомы сваімі пейзажамі, таму скульптар змясціў яго на фоне прыроды.

Мемарыяльную дошку зрабілі за свае сродкі сваякі мастака - яго дачка, доктар мастацтвазнаўства, загадчыца кафедры беларускай і сусветнай мастацкай культуры Беларускага дзяржаўнага ўніверсітэта культуры і мастацтва Вера Пракапцова і зяць Уладзімір Пракапцоў, дырэктар Нацыянальнага мастацкага музея Беларусі.

Уладзімір і Вера Пракапцовы

Уладзімір і Вера Пракапцовы прысутнічалі на адкрыцці мемарыяльнай дошкі. Сярод ганаровых гасцей таксама было шмат мастакоў, супрацоўнікаў музеяў і творчай інтэлігенцыі з Віцебска, Мінска, Магілёва.




Трэба адзначыць, што ўсе выступоўцы, акрамя прадстаўніцы віцебскай улады, гаварылі на роднай мове. Столькі беларускамоўных аратараў на афіцыйнай імпрэзе - вельмі рэдкая з'ява для Віцебска.

"Віцебск - такі прыгожы горад! Ён уплывае на людзей, якія тут жылі і жывуць. Уплываў ён і на Паўла Масленікава, на ягоную творчасць. Ягонае жыццё было прысвечана нашай зямельцы, нашай прыродзе. Гэта быў вельмі шчыры ў творчасці і грамадзянскай пазіцыі чалавек. Я добра яго ведаў пры жыцці, і гэта паспрыяла мне ў адлюстраванні ягонага вобраза", - адзначыў скульптар Павел Лук.

У абласным цэнтры сёння прайшлі і іншыя мерапрыемствы ў гонар майстра жывапісу. У прыватнасці, у абласной бібліятэцы адкрылася выстава прац Паўла Масленікава з фондаў Магілёўскага абласнога мастацкага музея.

Даведка TUT.BY

На будынку па вуліцы Суворава, 3, дзе знаходзіцца дзіцячая мастацкая школа №1, раней усталявалі мемарыяльныя дошкі, прысвечаныя пісьменніку Васілю Быкаву (2008 год, аўтар Аляксандр Гвоздзікаў), скульптару Заіру Азгуру (1997, Валерый Магучы), скульптару Андрэю Бембелю (2005, Аляксандр Гвоздзікаў), скульптару Сяргею Селіханаву (1979), архітэктару Уладзіміру Каралю (1997, Аляксандр Гвоздзікаў).

Усе гэтыя знакамітыя прадстаўнікі беларускай культуры ў свой час вучыліся ў Віцебскім мастацкім вучылішчы.