Квачы — назаўжды вы ў сэрцы маім.. Фотарэпартаж са свята вёскі. 21.by

Поделитесь с друзьями

Са звонкімі песнямі, танцамі і светлымі ўсмешкамі прайшло свята вёскі ў Квачах. Мерапрыемства было прысвечана людзям, якія жывуць і працуюць на роднай зямлі, гадуюць тут дзяцей, унукаў, праўнукаў, імкнуцца зрабіць прыгожымі свае падворкі і вуліцы.

Са словамі прывітання і віншавання да прысутных звярнуліся старшыня Высакаліпскага сельскага Савета дэпутатаў Наталля Карпач і галоўны спецыяліст па ідэалагічнай працы ААТ «17 верасня» Вольга Малец. Пачотныя госці пажадалі ўсім міру і працвітання, адзначыўшы, што для кожнага чалавека, які нарадзіўся ў вёсцы, яна назаўжды застанецца самым лепшым месцам на зямлі.

Сёння ў Квачах пражывае 149 чалавек, з іх 71 чалавек працаздольнага ўзросту, 64 — на пенсіі, і 14 — ва ўзросце да 16 гадоў. Квачы — вёсачка невялікая і ціхая, якая размешчана ў 12 кіламетрах ад чыгуначнай станцыі Гарадзея і на такой жа адлегласці ад раённага цэнтра. Тут ёсць усе неабходнае для жыцця — газ, электрычнасць, вадаправод, працуе фельчарскую акушэрскі пункт, прыватная крама, гандлёвае абслугоўванне таксама ажыццяўляюць аўтамагазіны «Еўраопт» і «Агракамбінат сноў».

Усяго тут налічваецца 85 асабістых падворкаў. Практычна ўсе яны дагледжаныя і маюць прывабны выгляд. Але галоўная каштоўнасць гэтага мястэчка гэта, напэўна, яго жыхары. Адрасуючы вяскоўцам самыя цёплыя і шчырыя пажаданні, у гэты дзень асабліва былі адзначаны старажылы К. В.Глобаж, М. А. Азарка, В.В. Івашка, Л.М. Навоша, Г.В. Шапавал, Я.А. Карпач, А.І. Верамейчык, І.І. Хрушч, У.І. Некраш і С.К. Хрушч, дружная сям’я Віталя і Кацярыны Азарка, у якіх нарадзіўся сын Арцём. Ён з’яўляецца самым маленькім жыхаром сяла. Таксама віншаванні прымалі сямейныя пары Аляксандра і Соф’і Пазняк, якія пражылі ў шлюбе 55 гадоў і Міхаіла і Таццяны Азарка — яны адзначылі 35-летні юбілей сумеснага жыцця. Не абыйшлося і без падарункаў.