Літары-вышаванкі і брэнды. Паглядзіце, як файна віцебская мастачка праілюстравала наш алфавіт

Источник материала:

Віцебская мастачка Тома Пракоф’ева праілюстравала «Беларускі алфавіт» — 28 з 32-х літар нашай азбукі яна аздобіла нейкай агульнавядомай адметнасцю краіны. Малюнкаў няма толькі да літар «ё», «й», «ь», «ы».

— «Беларускi алфавiт» задуманы ў якасці ілюстраванага даведніка для гасцей і жыхароў нашай краіны. Тут сабраныя славутасці, стравы, вядомыя людзі, святы і характэрныя жывыя беларускія словы, якія гучаць па-асабліваму. Прэзентаваць гэты праект — вельмі хвалююча. Напэўна, ён самы маштабны і важны для мяне, — прызнаецца Тома Пракоф’ева.

Мастачка кажа, што пакуль збірала матэрыял для алфавіта, даведалася шмат новага і цікавага пра месцы, архітэктурныя помнікі і людзей, якія пакінулі след у гісторыі Беларусі.

Алфавіт таксама ўтрымлівае шмат цікавостак:

— Практычна на кожную літару тут прадстаўлены беларускія словы, якія не маюць аналагаў у іншых мовах. Яшчэ тут ёсць сучасныя выканаўцы, фестывалі, падзеі і брэнды, без якіх немагчыма ўявіць жыццё нашай краіны, — дадае Тома.

Раней Тома стварыла «Віцебскі алфавіт» - візуалізацыю, дзе кожнай літары азбукі адпавядае якая-небудзь гарадская славутасць. А супольна з дызайнерам Юліяй Куцепавай мастачка робіць арыгінальныя сумкі — з партрэтамі пісьменнікаў.

А якія яшчэ словы вы дадалі б у «Беларускi алфавiт»? Пішыце, калі ласка, у каментарах.