У Мінску штотыдзень на грып і ВРВІ захворвае па 26,5 тысяч чалавек

Источник материала:

Паводле прагнозаў медыкаў, другая хваля эпідэміі грыпу павінна была пачацца ў краіне дзесьці ў першых чыслах лютага. Але як паведаміла Еўрарадыё загадчыца эпідэміялагічнага аддзела Мінскага гарадскога цэнтра гігіены і эпідэміялогіі Алена Фісенка, чаканай хвалі росту захворванняў Беларусь не “накрыла”. Тым не менш эпідэмія грыпу ўсё ж прысутнічае.

Алена Фісенка: “У нас сапраўды не сфармаваўся выразны эпідэмічны рост захворванняў, але рост захворванняў фіксуецца апошнія тры тыдні. Але ён спыніўся на такім перадэпідэмічным узроўні, на парогавых значэннях спыніўся - плюс-мінус тысяча. Цягам апошніх трох тыдняў у нас колькасць захварэўшых складала за тыдзень прыблізна 26 тыс. 500 чалавек”.

Усё адрозненне такога “вялага” цячэння эпідэміі ў тым, што яна расцягваецца па часе. І замест некалькіх тыдняў “пікавай” эпідэміі можа цягнуцца некалькі месяцаў. Так, па словах Алены Фісенкі, сёлетняя другая хваля эпідэміі закончыцца не раней за сярэдзіну красавіка.

Алена Фісенка: “Заканчэнне сезоннага ўздыму далёка ў нас. Звычайна толькі ў красавіку хвароба пераходзіць у міжэпідэмічны перыяд - калі яна зусім добра ідзе на зніжэнне. Але звычайна канец лютага - сакавік яшчэ захоўваецца рызыка захворвання на грып. Такім чынам, сезон будзе працягвацца яшчэ каля паўтара месяца”.

Прычына такіх паводзінаў вірусу грыпу, кажа эпідэміёлаг, ускосна звязана з марозным надвор’ем. Праўда, сам вірус марозу не баіцца, але баяцца людзі і паводзяць сябе адпаведна.

Алена Фісенка: “Калі мароз на вуліцы, людзі апранаюцца цяплей, менш пераахаладжэнняў. А пераахаладжэнне - гэта магутны стрэс, на фоне якога ідзе зніжэнне імунітэту і павышаная рызыка інфіцыравання вірусамі”.

Нікуды, кажа медык, не знік і вірус свінога грыпу. Па яе словах, з 26 з паловай тысяч мінчан, якія звяртаюцца штотыдзень да лекараў, каля 100 чалавек паступаюць з дыягназам цяжкая форма вострага рэспіраторнага захворвання. А з гэтых 100 - ад 2 да 6 чалавек трапляюць у шпіталь з дыягназам “пандэмічны грып AH1N1”.

Затое, па словах супрацоўніцы Мінскай санстанцыі, не фіксуюцца смерці ў выніку пнеўманіі.

Алена Фісенка: “Зараз такой лятальнасці не фіксуецца ў выніку пнеўманіі, якая стала ўскладненнем пасля грыпу. Бо яго няма ў такой колькасці. І ў выніку - ускладненняў няма. Ды і вірус пачаў губляць свае агрэсіўныя ўласцівасці, бо на сённяшні дзень каля 20% людзей у нас маюць абарончы імунітэт да пандэмічнага грыпу”.

Але ж 80% такога імунітэту не маюць, і таму Алена Фісенка раіць людзям, якія не прайшлі вакцынацыю, прайсці яе зараз. Асабліва з улікам таго, што па яе прагнозах, эпідэмія працягнецца яшчэ як мінімум паўтара месяца.

А вось па словах галоўнага эпідэміёлага Міністэрства аховы здароўя Іны Карабан, у нас не толькі няма ніякай другой хвалі эпідэміі грыпу, але і тыя сезонныя захворванні, якія назіраюцца цяпер, завершацца ў бліжэйшы час.

Іна Карабан: “У нас няма эпідэміі. І на сённяшні дзень у нас колькасць захворванняў ніжэй за эпідэміялагічны ўзровень. Па ідэі, напэўна ўздыму не будзе. Пакуль цяжка прагназаваць, але працэс захворванняў праходзіць вельмі плаўна і ўжо на гэтым тыдні пачала зніжацца колькасць захворванняў”.

Еўрарадыё паспрабавала даведацца, колькі людзей захварэла па краіне за апошнія некалькі тыдняў. Але супрацоўніца міністэрства паведаміла толькі, што лічба гэтая сёлета на 27,6% меншая, чым летась у гэты ж час. А на просьбу перавесці адсоткі ў колькасць людзей патлумачыла, што адсоткі для іх больш паказальныя.

Іна Карабан: “Паказчык захворванняў лічыцца на насельніцтва. Пра што нам кажа тое, што ў Мінску захварэла 5 тыс. чалавек на 2 млн жыхароў? Што гэта? А калі мы пералічваем гэта ў паказчыкі захворванняў, то для нас эпідэміёлагаў гэта больш інфарматыўна, чым проста лічыць лічбы. Яны мала даюць для погляду на рэчы”.

У той жа час яна прызнала, што і падчас цяперашняй “не-эпідэміі” ёсць тыя, што захварэлі на свіны грып, і тыя, хто злёг з пнеўманіяй. Але колькі іх, не назвала нават у “адсоткавых паказчыках”.