Супраць прастуды

Источник материала:

Калі залажыла нос

Лічыцца, што калі насмарк ужо пачаўся, то змагацца з ім бессэнсоўна і вы асуджаныя не расставацца з насоўкай на працягу цэлага тыдня. Аднак гэта не зусім так. Калі пачаць лячыцца своечасова, можна пазбавіцца ад яго ўсяго за пару дзён.

Адзін з самых эфектыўных спосабаў барацьбы з заложаным носам — паравыя інгаляцыі. Дадайце ў кіпень некалькі кропляў эфірнага алею ментолу або эўкаліпту, накрыйце галаву ручніком і падыхайце над міскай кіпеню. Эўкаліпт і ментол валодаюць супрацьзапаленчымі ўласцівасцямі і прыкметна палягчаюць дыханне. Нядрэнна, калі акрамя гэтых алеяў вы дабавіце ў ваду трохі сухой карыцы (яна дапаможа сагрэцца і прапацець) або 1/4 чайнай лыжкі каенскага перцу (паляпшае кровазварот і змагаецца з вірусамі).

Яшчэ адзін вядомы сродак супраць насмарку — добра папарыць ногі перад сном. Але рабіць гэта трэба не даўжэй за 5 хвілін.

Калі замучыў кашаль

Пры першых жа прыкметах кашлю ваша галоўная задача — добра прагрэцца і ўзмацніць імунітэт, каб дапамагчы арганізму пазбавіцца ад гэтай напасці.

Добры сагравальны эфект дае настой мяты пярцовай. Сталовую лыжку мяты заліце шклянкай кіпеню, награвайце 5 хвілін на слабым агні, працадзіце. Затым размяшайце ў гэтым настоі чайную лыжку мёду, сок чвэртачкі лімона і выпіце настой гарачым перад сном. Для замацавання эфекту нядрэнна зрабіць гарачы кампрэс, змяшаўшы тры часткі гарачай вады з адной часткай яблычнага воцату. Кампрэс прыкладваюць да горла і грудзей на 15—20 хвілін.

А каб умацаваць ахоўныя сілы арганізма, варта налягаць на аскарбінку і прадукты, якія на яе багатыя (цытрусавыя, свежая агародніна).

Калі баліць горла

Справіцца з болем у горле дапаможа паласканне цёплай вадой, у якую дадаюць некалькі кропляў эўкаліптавага, чабаровага або кіпарысавага алею. Усе гэтыя расліны аказваюць антыбактэрыяльнае дзеянне і змагаюцца з інфекцыяй.

Добра дапамагае і гарачая ванна, у якую дабаўлена 10 кропляў алею лаванды і 5 кропляў карычнага алею. Аднак калі, акрамя болю ў горле, у вас яшчэ і тэмпература паднялася, ванну лепш адмяніць: гарачая вада ў спалучэнні з гарачкай дае занадта вялікую нагрузку на сэрца. Таму замест ванны лепш проста расцерці ступні цвёрдым ручніком.

Аматарам піва спадабаецца такі супрацьпрастудны рэцэпт: сталовую лыжку высушанага лісця падбелу заварваюць як гарбату ў шклянцы кіпеню. Працэджваюць, дадаюць сталовую лыжку мёду і тры сталовыя лыжкі піва. Прымаюць цёплым па сталовай лыжцы 2—3 разы на дзень. Дарэчы, піва можна прымяняць і ў якасці кампрэсу, калі спіртавыя кампрэсы раздражняюць скуру шыі. Нагрэйце шклянку піва да 30 градусаў, дадайце 1 чайную лыжку мёду і размяшайце да растварэння мёду. Намачыце ў гэтай сумесі сурвэтку, абкруціце ёю шыю і ўхутайцеся цёплым шалікам.