У Мёрах плануюць пабудаваць медцэнтр з нямецкімі інвестыцыямі і тэхналогіямі

Источник материала:

У Мёрах збіраюцца пабудаваць міжраённы медыцынскі цэнтр з нямецкімі інвестыцыямі і тэхналогіямі. Размова аб гэтым ішла ў час наведвання Прэзідэнтам Беларусі Аляксандрам Лукашэнкам Мёрскай цэнтральнай раённай бальніцы, перадае карэспандэнт БЕЛТА. У медустанове Аляксандр Лукашэнка сустрэўся з беларускім бізнесменам Аляксеем Кавалёнкам, дзякуючы якому ў горадзе пачалі ўзводзіць унікальны прамысловы аб’ект з прыцягненнем нямецкіх інвестыцый і па нямецкіх тэхналогіях — Мёрскі металапракатны завод. Прадпрымальнік прапанаваў Прэзідэнту пабудаваць у Мёрах такім чынам яшчэ адзін аб’ект, але толькі ўжо ў сацыяльнай сферы — высокатэхналагічны кардыялагічны цэнтр па нямецкіх стандартах. Ён будзе створаны для аказання экстраннай і планавай спецыялізаванай дапамогі насельніцтву сумежных раёнаў і экспарту медыцынскіх паслуг замежным грамадзянам. Чакаецца, што медыцынскі цэнтр будзе функцыянаваць па прынцыпах дзяржаўна-прыватнага партнёрства. Яго будаўніцтва набывае асаблівую актуальнасць у сувязі з запускам у Мёрах у бліжэйшыя гады новага завода, які прыцягне ў горад дадатковыя працоўныя рэсурсы. «З бюджэту на будаўніцтва нічога не трэба, усё пабудуецца замежным партнёрам, кіраванне будзе замежнае. Такіх няма ні ў нас, ні ў Расіі, ні ў Казахстане», — адзначыў Аляксей Кавалёнак. Аляксандр Лукашэнка адказаў, што вывучыў гэты праект. «Калі мы будзем у цябе лячыць людзей, якія не могуць заплаціць, мы за іх будзем плаціць», — сказаў Прэзідэнт. Разам з тым ён падкрэсліў, што цэны павінны быць узважанымі. «Калі мы будзем бачыць, што нам гэта прапануюць для таго, каб зарабіць вялікія грошы (не думаю, што гэта так), мы адмовімся ад паслуг, таму што ў нас хапае, дзе лячыць людзей», — сказаў ён. Праекціроўшчыкам і пастаўшчыком абсталявання, калі рашэнне аб будаўніцтве медцэнтра будзе прынята, павінна стаць нямецкая кампанія KBV GmbH & Co. KG з больш як 40-гадовым вопытам работы ў сферы аховы здароўя. Плануецца, што інвестыцыі складуць амаль 77 млн ​​еўра. У час наведвання Мёрскай цэнтральнай раённай бальніцы кіраўнік дзяржавы наведаў рэнтген-кабінет, радзільнае і дзіцячыя аддзяленні. Там ён паразмаўляў з маладымі маці і ўручыў ім падарункі. «Мінімум тры-чатыры дзіцяці трэба нараджаць», — папрасіў іх Аляксандр Лукашэнка. Паводле слоў міністра аховы здароўя Валерыя Малашкі, бальніца ў Мёрах стала своеасаблівым стандартам на першым узроўні аказання медыцынскай дапамогі. Ён таксама праінфармаваў аб развіцці сістэмы аховы здароўя ў краіне ў цэлым. «У гэтым годзе мы з абласнымі выканаўчымі камітэтамі ўважліва адпрацавалі сацыяльны стандарт па ўкараненні інстытута ўрача агульнай практыкі, які сябе вельмі добра зарэкамендаваў у вёсцы. Сёння мы яго прыўносім на ўзровень раёнаў», — сказаў міністр. Асобную ўвагу Аляксандр Лукашэнка звярнуў на аказанне дапамогі пажылым людзям, асабліва адзінокім. «Трэба пераконваць гэтых людзей, якія адзінокія, якім цяжка, каб яны хаця б перазімавалі ў гэтай бальніцы. Нічога тут саромнага няма. Гэта старыя, і мы павінны іх дагледзець», — падкрэсліў ён. Новы корпус раённай бальніцы ў Мёрах на 80 ложкаў уведзены ў эксплуатацыю ў маі бягучага года. Там размясціліся прыёмнае, хірургічнае, педыятрычнае, акушэрскае, фізіятэрапеўтычнае аддзяленні, аддзяленне анестэзіялогіі і рэанімацыі, аперацыйна-перавязачны блок, дыягнастычныя кабінеты. Аснашчэнне аддзяленняў сучасным абсталяваннем дало магчымасць аказваць у бальніцы шматпрофільную меддапамогу на якасна новым узроўні, асвоіць і ўкараніць новыя методыкі абследавання і лячэння, пашырыць дыяпазон аперацыйных умяшанняў, у тым ліку эндаскапічных і малатраўматычных.
Чытаць поўнасцю: http://blr.belta.by/president/view/u-merah-planujuts-pabudavats-medtsentr-z-njametskimi-investytsyjami-i-tehnalogijami-70890-2018/