Валянціна Хаданёнак: галоўная медыцынская сястра Шаркаўшчынскай цэнтральнай раённай бальніцы

Источник материала:

Сэрца жанчыны – невычарпальная крыніца міласэрнасці, дабрыні і велікадушнасці. Напэўна таму прафесія медсястры стала, у большасці сваёй, жаночай. Яна патрабуе не толькі высокага прафесіяналізму і любові да сваёй справы, але і ахвярнасці, гатоўнасці прыйсці на дапамогу. Гэта, перш за ўсё ,  адказнасць за здароўе і жыццё людзей, падтрымка хворых пасля аперацый, выкананне назначэнняў, прадпісаных  урачом і шмат чаго іншага.  Як сцвярджаюць урачы, 70 працэнтаў поспеху пры лячэнні залежыць менавіта ад медыцынскіх сясцёр.

З гэтым згодны і галоўны ўрач Шаркаўшчынскай ЦРБ Станіслаў Тадэвушавіч Стома, асабліва калі размова ідзе пра галоўную медыцынскую сястру нашай цэнтральнай раённай бальніцы Валянціну Уладзіміраўну Хаданёнак. 35  год назад гэта абаяльная і прыгожая, а ў  той час яшчэ зусім маладая   18-гадовая дзяўчына  прыйшла на сваё першае працоўнае месца, каб больш не шукаць для сябе іншых дарог.

-Работу медыцынскай сястры нельга назваць лёгкай,-адзначае Валянціна Уладзіміраўна,  – Асабліва ў такім невялікім  гарадку як наш, калі  ведаеш кожнага чалавека і не можаш раўнадушна аднесціся да яго лёсу. І ўсё ж у іншай прафесіі я сябе не бачу і не ўяўляю. Ні на хвіліну не пашкадавала аб тым, што,  закончыўшы з адзнакай Полацкае медыцынскае вучылішча, прыехала працаваць у Шаркаўшчынскую ЦРБ.

Сёння Валянціна Хаданёнак, медыцынская сястра вышэйшай кваліфікацыйнай катэгорыі,  можа з лёгкасцю расказаць пра спецыфіку работы практычна ў любым аддзяленні бальніцы – многае давялося паспытаць на сабе. У 1984 годзе яе працоўны шлях  пачаўся  ў тэрапеўтычным аддзяленні нашай цэнтральнай раённай бальніцы. А ўжо праз месяц ініцыятыўную і перспектыўную медыцынскую сястру заўважылі і  назначылі выконваць абавязкі старшай медыцынскай      сястры ў тэрапіі, на гэтай пасадзе жанчына адпрацавала наступныя 19 год. А ў 2003 годзе атрымала павышэнне —  стала галоўнай медыцынскай сястрой установы аховы здароўя раёна  і працуе на гэтай пасадзе па сённяшні дзень.

Працоўны дзень для мяне праходзіць так хутка, што не паспяваю і заўважыць,- з усмешкай адзначае мая суразмоўца. І разам з тым гэта жанчына  з такой цеплынёй расказвае  пра асаблівасці і нюансы сваёй няпростай прафесіі, што адразу становіцца зразумела: за мінулыя 35 год работа не стала руцінай, а наадварот, дадала вопыту, многае дала і ў разуменні самой  прафесіі.

Калектыў Шаркаўшчынскай ЦРБ, на сённяшні дзнь, налічвае  звыш 380 чалавек. 163 з іх – прадстаўнікі сярэдняга медыцынскага персаналу (медыцынскія сёстры, фельчары, фельчары-лабаранты). Валянціна Уладзіміраўна арганізуе работу сярэдняга і малодшага медыцынскага персаналу, займаецца пытаннямі арганізацыі іх працы і павышэння кваліфікацыі, ажыццяўляе кантроль за работай медыцынскіх сясцёр, фельчараў, акушэраў. А некалькі  гадоў назад ініцыятыўная і вопытная галоўная медсястра  з выдатнымі арганізатарскімі здольнасцямі, якая  ўзначальвае  прафсаюзны камітэт райбальніцы на працягу  ўжо 10 год, заваявала перамогу ў абласным конкурсе медыкаў сярод кіраўнікоў сярэдняга звяна  у Віцебскай вобласці. Пад кіраўніцтвам Валянціны Уладзіміраўны ў Шаркаўшчынскай ЦРБ створана моцная прафсаюзная арганізацыя, якая неаднаразова ўваходзіла ў лік пераможцаў розных конкурсаў.

У гераіні гэтага матэрыялу  ўжо двое дарослых дзяцей і маленькая ўнучка Аліса, якая з ранняга дзяцінства цікавіцца медыцынай і нават марыць стаць стаматолагам. А няйздзейсненую мару Валянціны Уладзіміраўны стаць урачом рэалізуе яе дачка Дар’я – будучы ўрач-педыятр,якая ўжо ў наступным годзе атрымае дыплом  аб вышэйшай медыцынскай  адукацыі і прыедзе на працу ў Шаркаўшчынскую цэнтральную раённую бальніцу.

Вольга ЧАРНЯЎСКАЯ.