У Салігорску міліцыянты сарвалі конкурс малюнкаў на асфальце

29.07.2010 13:53 — ЧП |

Размер текста:: A; A; A

Источник материала:

У горадзе ля крамы "Дзіцячы свет" мусіў адбыцца конкурс малюнкаў на тэму любові да Радзімы, які традыцыйна 27 ліпеня, у гадавіну абвяшчэння Дэкларацыі незалежнасці, ладзіць салігорскі "Малады Фронт".

За паўгадзіны да мерапрыемства ў двух хлопцаў з Мінска, што прыехалі паглядзець імпрэзу, міліцыянты даглядзелі рэчы ў заплечніках і перапісалі пашпартныя дадзеныя.

А 18-й гадзіне сабралася каля двух дзясяткаў ахвочых памаляваць крэйдай на асфальце.

Спецыяльна дзеля конкурса прыехалі са сталіцы супрацоўнікі БТ.

"Зараз уключым музыку, пачнём маляваць — шмат людзей далучыцца", — распавялі арганізатары, зыходзячы з мінулага досведу. Аднак супраць малявання на асфальце выступілі міліцыянты, якіх сёлета налічвалася досыць шмат: чалавек пятнаццаць у форме і некалькі ў цывільным.

Іван Шыла, адзін з ініцыятараў штогадовага конкурса, марна спрабаваў дамовіцца з праваахоўнымі органамі. Урэшце юнак заклікаў пачынаць маляваць і сам узяўся за крэйду.

Неўзабаве пяцёра юнакоў — Рыгор Астапеня, Іван Шыла, Андрусь Тычына, Ілля Нагорны, Сяргей Герановіч — апынуліся ў міліцэйскіх машынах, адна з каторых выглядала зусім па-цывільнаму. Перад затрыманнямі хлопцы паспелі намаляваць толькі некалькі лініяў.

Маладафронтавец Аляксей Валабуеў абвясціў прысутным, што конкурс не адбудзецца і заклікаў падыйсці да пастарунку, каб маральна падтрымаць затрыманых. Праз хвіліну Аляксей ужо сядзеў каля Івана ў міліцэйскай машыне.

Паплечнікі затрыманых сабралі прыгатаваныя пераможцам конкурса падарункі, крэйду ды рушылі ў бок парка. За дзеяннямі моладзі ў скверы цягам некалькіх гадзін сачыла "ахова" з пяці-дзесяці супрацоўнікаў МУС. Зрэдку паміж міліцыяй і моладдзю адбываліся перамовы. З выхаваўчай размоваю міліцыянт падыходзіў нават да маці дзіцяці, якое малявала крэйдаю на бруку.

У пастарунку на затрыманых склалі пратаколы па артыкуле 23.34 Адміністрацыйнага кодэксу "удзел у несанкцыянаваным мерапрыемстве". Праз тры гадзіны ўсіх шасцярых адпусцілі.