На мяжы з Беларуссю злавілі балгарына, якога на радзіме шукаюць за забойства

На беларуска-польскай мяжы памежнікі пасля таго, як спрацавала сігналізацыя, затрымалі грамадзяніна Балгарыі. Як паведамляе прэс-служба Дзяржаўнага памежнага камітэта, парушальнік мяжы ішоў з Польшчы ў Беларусь.

Пры сабе мужчына меў навігатар, мапу, пашпарт, сродкі адпалохвання сабак і 40 еўра.

Падчас праверкі выявілася, што мужчына знаходзіцца ў базе Інтэрпола. Яго шукаюць за забойства, учыненае на тэрыторыі Балгарыі.

Паведамляецца, што парушальніка мяжы памежнікі плануюць перадаць супрацоўнікам органаў унутраных спраў.