Мужчыны, якія збілі кантралёра ў Гродне, самі прыйшлі ў міліцыю

У гродзенскую міліцыю звярнуліся два мужчыны, якіх шукалі за збіццё кантралёра на прыпынку грамадскага транспарту. Гэта адбылося пасля таго, як гродзенскія праваахоўнікі апублікавалі фота парушальнікаў у інтэрнэце.

Здарэнне адбылося днямі на адным з прыпынкаў. Паведамлялася, што кантралёры злавілі нецвярозага безбілетніка, які не хацеў плаціць штраф. На прыпынку за яго пачалі заступацца два мужчыны, якія збілі 49-гадовага кантралёра так, што ён атрымаў пералом носа, закрыты пералом пальца і закрыты пералом копчыка.

Мужчыны заявілі, што яны хацелі заступіцца за пасажыра без білета і гатовыя былі заплаціць за яго штраф. Падчас спрэчкі, па іх словах, яны размахвалі рукамі і неасцярожна зачапілі кантралёра. Гэта выклікала бойку.

Мужчыны кажуць, што кантралёр адштурхнуў аднаго з іх, у адказ той стукнуў кантралёра так, што той зваліўся на зямлю. Кантралёр зваліўся і атрымаў траўмы.

УУС Гродзенскага аблвыканкама праводзіць разбіральніцтва па гэтым факце.