Жанчына, якую былы муж выкінуў у акно ў Гомелі, памерла ў бальніцы

Жанчына, якую былы муж выкінуў у акно сёмага паверха ў Гомелі, у панядзелак удзень памерла ў бальніцы. Перад гэтым у "хуткай" яна перажыла клінічную смерць, але медыкі завялі яе сэрца. Новыя падрабязнасці трагічнага здарэння паведамляе kp.by. Вядома, што трагедыя адбылася ўвечары 23 кастрычніка. 36-гадовы мужчына і 38-гадовая жанчына былі ў разводзе, але працягвалі жыць разам у трохпакаёвай кватэры (а з імі дзве дачкі). Паміж імі ўзнікла сварка, падчас якой мужчына выкінуў сваю былую жонку ў акно, а пасля сам выклікаў міліцыю.

Сайт kp.by паведамляе, што разводу ў верасні папярэднічала гісторыя, якая адбылася год таму. У мужчыны з'явілася іншая жанчына, пачаліся скандалы. Аднойчы ён збіў жонку, яго аштрафавалі за нанясенне лёгкіх цялесных пашкоджанняў. Суседзі кажуць, што прычынай цяперашняга канфлікту стала жыллё, якое яны не маглі падзяліць — мужчына прыводзіў у кватэру сваю знаёмую.

Сведкамі трагічнага здарэння сталі дочкі ва ўзросце 9 і 13 гадоў. Іх верагодна забрала бабуля. Паводле папярэдняй інфармацыі, мужчына быў цвярозы. Цяпер ён знаходзіцца ў ізалятары. У яго адносінах распачалі крымінальную справу па артыкуле забойства з асаблівай жорсткасцю.

Вядома, што мужчына працаваў кіроўцам аўтобуса, яго былая жонка мела рабочую спецыяльнасць.