Мужчыну, пацярпелага пры аварыі на "Брэстбытхіме", выпісалі з лякарні

Мужчыну, які пацярпеў пры аварыі на Брэсцкім заводзе бытавой хіміі, выпісалі з лякарні, інфармуе БЕЛТА са спасылкай на Брэсцкую цэнтральную гарадскую лякарню.

Як паведамляла Еўрарадыё, інцыдэнт у цэху па вытворчасці сінтэтычных сродкаў і разліву іх у дробную тару здарыўся 6 траўня. Там адбылася ўцечка пароў хімічнага рэчыва. З прадпрыемства эвакуявалі 46 работнікаў. Аднаго з іх — 63-гадовага слесара — давялося шпіталізаваць з дыягназам таксічным атручаннем. Пасля дыягностыкі і лячэння брэстаўчаніна 8 траўня быў выпісаны ў здавальняючым стане. Мужчыну накіравалі для далейшага назірання і лячэння да ўчастковага тэрапеўта.

Асноўнай версіяй здарэння следства называе парушэнне тэхналагічнага працэсу. Былі памылкова залітыя кампаненты, што прывяло да выдзялення пароў ўнутры рэзервуара. Ёмістасць у той момант герметычна зачыненая не была. 

Паведамляецца, што здарэнне не пацягнула ніякіх разбурэнняў і пашкоджанняў.