Бабруйчаніна вінавацяць у замаху на забойства

Бабруйскі міжраённы аддзел Следчага камітэта пачаў крымінальную справу на 28-гадовага беспрацоўнага мясцовага жыхара. Мужчыну падазраюць у замаху на забойства, паведамляе прэс-служба Следчага камітэта.

Паводле звестак следства, 20 лістапада бабруйчанін гасцяваў у кватэры свайго знаёмага. У нецвярозым выглядзе ён пагражаў кухонным нажом цяжарнай жонцы гаспадара. Жанчына рэальна ўспрыняла пагрозу жыццю і здароўю.

За яе заступіўся 61-гадовы пенсіянер, які таксама гасцяваў у гэтым доме. Тады мужчына некалькі разоў стукнуў яго нажом па розных частках цела.

Гаспадары кватэры выклікалі хуткую дапамогу і міліцыю. Дзякуючы своечасовай меддапамозе пацярпелы выжыў.

Падазраванага затрымалі, ён дае паказанні. На мужчыну могуць пачаць яшчэ адну крымінальную справу — за пагрозу забойствам.