У Мінску аўтамабіль, якім кіраваў п’яны мужчына, сутыкнуўся з машынай ДАІ

У Мінску аўтамабіль, якім кіраваў п’яны мужчына, сутыкнуўся з машынай ДАІ. Здарэнне адбылося раніцай 17 снежня ў двары дома па вуліцы Русіянава. Як інфармуе БЕЛТА, спачатку ў міліцыю паступілі тры тэлефанаванні пра кіроўцу Citroen Xantia, які паводзіў сябе неадэкватна. Адзін з экіпажаў ДПС знайшоў гэтую машыну і пабачыў, як яна звярнула ў арку аднаго з дамоў. Легкавік даішнікаў спыніўся за Citroen Xantia і заблакаваў ёй выезд. Раптоўна Citroen паехаў заднім ходам і адбылося сутыкненне.

Кіроўцу затрымалі. Высветлілася, што зламысніка яшчэ ў 2011 годзе пазбавілі вадзіцельскіх правоў за язду ў стане алкагольнага ап’янення. На гэты раз па выніках медасведчання ў яго крыві выявілі 2 праміле алкаголю.