КДБ: Намеснік міністра аховы здароўя атрымліваў хабар да 10 тысяч долараў

Камітэт дзяржаўнай бяспекі затрымаў за хабар намесніка міністра аховы здароўя Ігара Ласіцкага. Пра гэта распавёў старшыня КДБ Валерый Вакульчык. Паводле яго слоў, намеснік міністра затрыманы і змешчаны пад варту за спрыяльнае рашэнне пытанняў, якія тычацца арганізацыі дзяржаўнай рэгістрацыі вырабаў медпрызначэння, а таксама лаяльнае стаўленне пры выбары пастаўшчыкоў медтэхнікі.

"Сумы хабару вар'іраваліся ад 2,5 да 10 тысяч долараў", — адзначыў Валерый Вакульчык.

Акрамя Ласіцкага, паведамляе БЕЛТА, КДБ затрымаў гендырэктара прадпрыемства "Белфармацыя" Вячаслава Гніція (атрымліваў хабар за арганізацыю першачарговых разлікаў з камерцыйнымі структурамі, а таксама за выбар "патрэбных" пастаўшчыкоў медпрадукцыі).

Таксама 23 чэрвеня пры атрыманні чарговага хабару ў 5 тысяч долараў на месцы злачынства затрымалі дырэктара ААТ "Экзон" Валерыя Васкевіча. У ведамстве адзначылі, што доўгі час ён атрымліваў незаконныя грашовыя ўзнагароджанні за заключэнне дагавораў на пастаўку прадукцыі на адрас ААТ і паступовы пераход па сутнасці дзяржаўнага прадпрыемства пад кантроль камерцыйнай структуры. Гаворка ідзе пра суму не менш за 25 тысяч долараў.

Нагадаем, што на дадзены момант за здзяйсненне злачынстваў па артыкулах 430 (атрыманне хабару), 431 (дача хабару) і 243 (ухіленне ад выплаты сум падаткаў, збораў) КК, Камітэтам дзяржбяспекі затрыманыя, заключаныя пад варту, а таксама ўжытыя іншыя меры стрымання ў дачыненні да 37 службовых асоб. Усяго ў "справе дактароў" больш за 60 фігурантаў.