З АПЕРАТЫЎНЫХ ЗВОДАК ТЫДНЯ

«Бярозы спілавалі незаконна?», «Праблемная» жыхарка інтэрната», «Аб’ект крадзяжу – рухавік лодкі»…

Фото: www.gants-region.info

Злодзей выяўлены

13 жніўня па матэрыяле РАУС узбуджана крымінальная справа ў адносінах да 63-гадовага жыхара вёскі Ганцавічы.

3 жніўня мужчына ўкраў паваротны круг прычэпа. Тым самым злодзей нанёс матэрыяльны ўрон КФГ «Сам-Агра» на 318 рублёў.

Аб’ект крадзяжу – рухавік лодкі

13 жніўня па матэрыяле РАУС узбуджана крымінальная справа па заяве жыхара Ганцавіч 1967 года нараджэння. Неўстаноўленая асоба 11 жніўня, знаходзячыся на ўчастку вадасховішча «Лактышы», украла рухавік з лодкі, якая належыць заяўніку.

Кошт матэрыяльнага ўрону пацярпелага – 1200 рублёў.

Памерла двухмесячнае дзіця

13 жніўня ў рэанімацыйным аддзяленні Ганцавіцкай ЦРБ памерла дзіця ва ўзросце двух месяцаў. Праверку праводзіць РАСК.

«Праблемная» жыхарка інтэрната

14 жніўня ў міліцыю паступіла паведамленне каменданта інтэрната Ганцавіцкай РЖКГ.

Жанчына расказала, што адна з жыхарак інтэрната, знаходзячыся ў стане алкагольнага ап’янення, курыць. Пры гэтым у яе на пліце згарэла ежа, з-за чаго спрацавала пажарная сігналізацыя. У адносінах да парушальніцы парадку складзены адміністрацыйны пратакол па ч. 1 арт. 17.3 КоАП Рэспублікі Беларусь.

Дзве смерці за паўгадзіны

15 жніўня ўзбуджана крымінальная справа ў адносінах да мужчыны, які падчас сваркі з былой жонкай нанёс апошняй не менш чым восем удараў нажом у розныя часткі цела. Ад атрыманых цялесных пашкоджанняў жанчына памерла на месцы здарэння. Амаль адразу пасля гэтага сам забойца пакончыў з жыццём у гаражы па вуліцы Заводскай.

Прапажа качанят

16 жніўня ў РАУС паступіла паведамленне жыхаркі райцэнтра П. Жанчына расказала, што ў яе прапалі 32 качаняты і 2 вялікія качкі. А недалёка яна бачыла лісу. Матэрыял накіраваны ў РАС РДГА БТПР.

Бярозы спілавалі незаконна?

17 жніўня ў міліцыю звярнуўся жыхар Хатыніч, які расказаў, што аднавяскоўка і яе знаёмы незаконна спілавалі дзве бярозы. Матэрыял праверкі накіраваны ў Ганцавіцкую інспекцыю прыродных рэсурсаў і аховы навакольнага асяроддзя.

Зарэзаў жонку і ўцёк

19 жніўня на прасёлкавай дарозе ад вуліцы Савецкай да МТФ № 4 ААТ «Бярозавец» у Малькавічах знойдзены труп мясцовай жыхаркі 1977 года нараджэння.

Устаноўлена, што забойства жанчыны здзейсніў яе былы сужыцель. Пасля злачынства мужчына ўцёк з месца здарэння. Ганцавіцкім РАСК узбуджана крымінальная справа па ч. 1 арт. 139 КК РБ.

Сямейныя разборкі

19 жніўня ў РАУС звярнуўся жыхар Ганцавіч і расказаў, што, калі прыехаў да былой жонкі, каб наведаць дзіця, былая цешча яго не пусціла, а цацкі для дзіцяці выкінула ў агарод.

Зводкі чытала Вікторыя ПРЫКОТА.