Мінчанка атрымала ў тралейбусе электратраўму

24-гадовая мінчанка атрымала ў тралейбусе электратраўму. Здарэнне адбылося ўвечары 15 студзеня на прыпынку "Плошча Бангалор". Калі дзяўчына спрабавала зайсці ў тралейбус, яе ўдарыла токам. Спачатку пры спробе зайсці ў салон праз заднія дзвяры, пасля — праз сярэднія. Пасажырка пайшла да кіроўцы і сказала, што тралейбус б'ецца токам. Пасля гэтага былі высаджаныя ўсе пасажыры, а тралейбус з'ехаў, інфармуе tut.by.

Дзяўчына незадаволеная, што кіроўца не пацікавілася, як яна сябе адчувае. "Хуткую" пасажырка выклікала самастойна. Ужо ў бальніцы яе наведвалі прадстаўнікі "Мінсктранса", прынеслі прабачэнні. Паводле іх слоў, тралейбус выходзіў на лінію ў спраўным стане. Яны сцвярджаюць, што ўцечкі тока не магло быць, а справа, верагодна, у "павышанай адчувальнасці" дзяўчыны і ў статычнай электрычнасці. Пры гэтым 18 студзеня мінчанку выпісалі з бальніцы з дыягназам "наступствы электратраўмы". Што да кіроўцы, дык яна дзейнічала па інструкцыі.

Пацярпелая кажа, што хацела б атрымаць матэрыяльную кампенсацыю.