Віцяблянін знайшоў два марскія гадзіннікі з радыяцыяй

15 верасня ў 18:28 да віцебскіх ратавальнікаў звярнуўся мужчына з паведамленне, што ў яго ёсць два марскія гадзіннікі з перавышэннем радыяцыйнага фону, паведамляе прэс-служба МНС.

Дакументаў з тэхнічнымі характарыстыкамі гадзіннікаў не было. Ратавальнікі правялі замеры гама- і бэта-выпраменьвання: на паверхні абодвух прыстасаванняў фон быў значна вышэйшы за натуральны.

Паводле папярэдніх звестак, у люмінесцэнтнай фарбе пакрыцця цыферблата для святла выкарыстоўвалася радыеактыўнае рэчыва радый-226. Гэтыя даныя ўдакладняюцца. Пытанне пра ўтылізацыю гадзіннікаў вырашаецца.

Дарэчы, падобны выпадак адбыўся 7 верасня ў Міёрскім раёне. Там мужчына знайшоў карабельны гадзіннік з радыяцыяй і прынёс яго да ратавальнікаў.