Спаленую вёску ў Шчучынскім раёне наведалі марадзёры

Спаленую вёску Нарчы ў Шчучынскім раёне наведалі марадзёры. Яны скралі каля 600 кг металу. Па факце крадзяжу распачалі крымінальную справу, паведамляе "Гродзенская праўда" са спасылкай на абласное ўпраўленне Следчага камітэта.

Здарэнне адбылося 7 красавіка. Адзін з мясцовых жыхароў паліў на сваім падворку сухую траву і не заўважыў, што распачаўся пажар. У вёсцы згарэў 21 дом з 24-х. На шчасце, ніхто з людзей не пацярпеў. У Нарчы стала жылі толькі чатыры сям'і. У дачыненні пенсіянера распачалі крымінальную справу.

Што забралі марадзёры на пажарышчах? Металічныя слупы, сельскагаспадарчую тэхніку, розныя металічныя рэчы. Страты ацанілі на суму 180 рублёў. Міліцыя шукае зламыснікаў.