Аляксандр Лукашэнка: "У Беларусі неабходна больш інтэнсіўна развіваць вытворчасць, якая працуе на айчыннай сыравіне"

Источник материала:

Такую задачу паставіў учора Прэзідэнт краіны Аляксандр Лукашэнка падчас наведвання ААТ "Бярозабудматэрыялы", перадае БЕЛТА.

Як далажыў кіраўніку дзяржавы генеральны дырэктар прадпрыемства Мікалай Жук, аб'ём вытворчасці прадукцыі ў 2010 годзе ў параўнанні з папярэднім годам павялічыўся амаль на 16 працэнтаў да Br130 млрд. Пасля наведвання Аляксандрам Лукашэнкам гэтага прадпрыемства ў 2007 годзе і дадзенага ім даручэння па нарошчванні вытворчасці тут быў адкрыты новы цэх, у якім ужо ў 2008 годзе выпушчана першая прадукцыя. Прадукцыя прадпрыемства запатрабавана не толькі на беларускім рынку, але і ў краінах блізкага і далёкага замежжа, куды пастаўляецца амаль 55 працэнтаў выпускаемых будматэрыялаў. Паводле слоў кіраўніка прадпрыемства, гэты аб'ём плануецца павялічыць да 80 працэнтаў. У цэлым жа ў 2010 годзе было экспартавана прадукцыі на $25 млн, у той час як у 2000 годзе гэты паказчык складаў крыху больш як $3 млн. За мінулы год прадпрыемства спрацавала з дадатным сальда $15,6 млн.

На ААТ "Бярозабудматэрыялы" выпускаецца два віды прадукцыі: керамічная плітка для ўнутранай абліцоўкі сцен і падлогі і ў нязначных аб'ёмах цеплаізаляцыйныя матэрыялы з мінеральнай ваты. У 2002 годзе на прадпрыемстве было ўстаноўлена высокатэхналагічнае абсталяванне па вытворчасці керамічнай пліткі італьянскай фірмы Sасmі. Прадукцыя прадпрыемства адпавядае сусветным стандартам якасці.

Прадпрыемства выпускае амаль 6 млн кв.м керамічнай пліткі ў год. Паводле слоў Мікалая Жука, ужо ў гэтым годзе плануецца нарасціць вытворчасць яшчэ на 2 млн кв.м, а ў 2013 годзе — на 3 млн кв.м. Як адзначыў Прэзідэнт, пры наяўнасці вялікага попыту неабходна больш інтэнсіўна нарошчваць аб'ёмы, арыентуючыся на падобныя еўрапейскія вытворчасці, дзе ў год выпускаецца больш як 14 млн кв.м пліткі.

"Трэба глядзець. Калі ёсць такі высокі попыт на прадукцыю, то неабходна больш інтэнсіўна нарошчваць аб'ёмы", — сказаў кіраўнік дзяржавы. У той жа час ён падкрэсліў: "Трэба нарошчваць тую вытворчасць, пад якую ёсць свая сыравіна".

Падчас наведвання прадпрыемства была закранута і тэма дзяржаўнай падтрымкі. Як адзначыў Прэзідэнт, дзяржава будзе аказваць дапамогу, але толькі там, дзе яна неабходная. Прадпрыемствы, якія добра працуюць, павінны разлічваць на свае сілы і своечасова вяртаць крэдытныя сродкі. "Дапамагаць мы будзем, але там, дзе напружаная сітуацыя, — сказаў Аляксандр Лукашэнка. — Трэба грошы ўкладваць і ў іншыя прадпрыемствы, нам усюды трэба ствараць такія "цацкі", дзе добрыя аб'ёмы і высокая якасць прадукцыі. А там, дзе трэба дапамагчы, мы і будзем дапамагаць".