Крыжаноўскі дэпутатцы Шылавай на тэледэбатах: "Ідзіце і варыце боршч"

У дэбатах па Паўднёва-Заходняй акрузе Мінска, якія выйшлі ў эфір тэлеканала "Беларусь-2" узялі ўдзел двое кандыдатаў — дзейная дэпутатка Святлана Шылава, высунутая ў кандыдаты ад мясцовай паліклінікі, а таксама актор Яўген Крыжаноўскі ад ЛДП. А вось замест сябра АГП Уладзіміра Раманоўскага прыйшоў старшыня партыі Анатоль Лябедзька як ягоная давераная асоба.

"Уладным" кандыдатам на гэтай акрузе лічыцца скандальна вядомая дэпутатка Святлана Шылава.

Яна праславілася сваёй заявай пра тое, што заробку ў тры мільёны рублёў дастаткова для сям’і з двума дзецьмі. Менавіта да яе адрасавалі свае вострыя пытанні і Лябедзька, і Крыжаноўскі, ператварыўшы дэбаты ў спектакль.

"Мне здаецца, што хопіць аднаго тэрміну, — пачаў здалёк пытанне да доктаркі Шылавай Яўген Крыжаноўскі. — Яна выдатны спецыяліст. Прафесія чакае вас, Святлана Дзмітрыеўна! Я лічу, што трэба вяртацца ў сям’ю".

Шылава паспрабавала адказаць, што падчас дэпутацтва працягвала доктарскую дзейнасць, і менавіта яе веды патрэбныя парламенту. Аднак Крыжаноўскі зноў вярнуўся да тэмы, калі Шылава заявіла, што з’яўляецца намесніцай Саюза жанчын Беларусі.

"Вы ж паважаеце Лідзію Міхайлаўну Ярмошыну? А што яна сказала ў жывым эфіры? — звярнуўся ён за дэпутаткі і, не даючы адказаць, працягнуў: — Яна сказала: жанчыны, не займайцеся палітыкай, варыце баршчы. У вас трое дзяцей, муж, варыце ім баршчы".

Шылава паспрабавала выкруціцца з сітуацыі, робячы кампліменты Ярмошынай, але пра боршч так і не адказала.

Лябедзька за час дэбатаў паспеў узгадаць многія праблемныя пытанні — тое, што дваццаці кандыдатам у дэпутаты ад АГП не дазволілі звярнуцца да выбарцаў з тэлеэкрану, фальсіфікацыі і маніпуляцыі на папярэдніх выбарах у парламент, адказнасць уладаў за эканамічны крызіс, наяўнасць у краіне палітвязняў.

Калі ж Шылава задала яму пытанне з падколкай, хто пойдзе ў парламент у выпадку перамогі Раманоўскага — Лябедзька ці сам Раманоўскі, старшыня АГП не палез за словам у кішэню. "Калі ў Беларусі будуць выбары, выбяруць Раманоўскага, і ён будзе годным кандыдатам. А ў нас пакуль не выбіраюць, а прызначаюць, таму хутчэй за ўсё будзеце дэпутатам вы", — адрэзаў ён.