Аляксандр Лукашэнка пацвердзіў курс на далейшую інтэграцыю з Расіяй у рамках Саюзнай дзяржавы

Источник материала:

Прэзідэнт Беларусі Аляксандр Лукашэнка пацвердзіў курс на далейшую інтэграцыю з Расіяй у рамках Саюзнай дзяржавы. Аб гэтым кіраўнік дзяржавы заявіў учора на прэс-канферэнцыі для прадстаўнікоў расійскіх рэгіянальных СМІ.

"За мінулае дзесяцігоддзе мы з вамі сталі сведкамі многіх, я нават сказаў бы, лёсавызначальных падзей у жыцці нашых дзяржаў. Нашы краіны прайшлі на гэтым адносна кароткім адрэзку часу няпросты шлях. Тут было ўсё — ад вострых спрэчак, нават канфліктаў у адносінах паміж Расіяй і Беларуссю да брацкай падтрымкі ў вельмі складаныя моманты гісторыі", — адзначыў кіраўнік дзяржавы.

"Самае галоўнае: мы пераканаліся ў слушнасці фундаментальнага тэзіса аб тым, што нам, Беларусі і Расіі, у гэтым бурным і вечна канкурыруючым свеце адзін без аднаго проста ніяк нельга, — падкрэсліў Аляксандр Лукашэнка. — Моцнымі і незалежнымі нашы краіны, як аказалася, нікому не патрэбны, акрамя нас саміх. Канкурэнцыя сёння вострая як ніколі. І ўладары свету адкрыта грэбуюць правіламі, пісанымі і няпісанымі. Таму беларусы і расіяне проста вымушаны змагацца за сваё месца пад сонцам, прычым дастойнае месца, якога нашы народы, безумоўна, заслугоўваюць. І жыццё ўжо даказала, што разам мы гэтага можам дабіцца".

Гаворачы аб будаўніцтве Саюзнай дзяржавы Беларусі і Расіі, Прэзідэнт адзначыў, што гэты працэс трэба ацэньваць як абсалютна правільны і дальнабачны крок. "Павінен сказаць, што пакуль на постсавецкай прасторы гэты працэс дасягнуў такой глыбіні, якой мы не дасягнулі па іншых праектах супрацоўніцтва, у тым ліку ў Адзінай эканамічнай прасторы. Пакуль што глыбіня нашых адносін у беларуска-расійскім аб'яднанні значна вышэйшая", — канстатаваў беларускі лідар.

"Гэта сапраўды ўнікальнае інтэграцыйнае аб'яднанне. І мы тут маем ужо не толькі парасткі, але сістэму і структуру, якая дасць магчымасць нам пры жаданні эліт нашых дзяржаў вельмі хутка рушыць наперад да стварэння магутнага дзяржаўнага аб'яднання", — упэўнены кіраўнік дзяржавы.

У будаўніцтве Саюзнай дзяржавы Беларусі і Расіі ідзе шліфоўка, але няма радыкальнага руху наперад, лічыць Аляксандр Лукашэнка. Адказваючы на пытанне наконт магчымага прыняцця Канстытуцыйнага акта Саюзнай дзяржавы, Аляксандр Лукашэнка, у прыватнасці, адзначыў: "Ідзе нейкая шліфоўка, але няма радыкальнага руху наперад, аб якім думаеце вы і ўсе народы".

Прэзідэнт Беларусі нагадаў, як пачыналася будаўніцтва Саюзнай дзяржавы: "Вы ўсе цудоўна памятаеце той няпросты час таго пагаднення, якое мы падпісвалі з Барысам Мікалаевічам Ельцыным. Мы асабіста працавалі над гэтым дагаворам". Акрамя таго, Аляксандр Лукашэнка дадаў, што, яшчэ выбіраючыся на першы прэзідэнцкі тэрмін, ён уключаў у сваю праграму задачу стварэння саюза беларускай і расійскай дзяржаў. Пазней па ініцыятыве Прэзідэнта Беларусі быў праведзены адпаведны рэферэндум: "Сёння мае імкненні па саюзніцкіх адносінах з Расійскай Федэрацыяй заснаваны на меркаванні беларускага народа".

Акрамя таго, ён закрануў пытанне ўвядзення адзінай валюты: "Нам нечакана замест правядзення рэферэндуму прапанавалі ўвесці адзіную валюту. У нас там прапісана, што адзіная валюта будзе, але ж не абавязкова беларускі або расійскі рубель. Гэта мы павінны былі дамовіцца, але нам прапанавалі адзіную валюту, і гэтай адзінай валютай павінен быць расійскі рубель. Потым нам прапанавалі, што эмісійны цэнтр будзе выключна адзін — у Расійскай Федэрацыі, і ўсю палітыку будзе вызначаць расійскі Цэнтрабанк. І гэта, можа, было б не страшна, але чаму толькі аб валюце размова ідзе?". Прэзідэнт растлумачыў, што для стварэння такога адзінага дзяржаўнага аб'яднання, як Саюзная дзяржава, трэба разглядаць усе напрамкі, пачынаючы ад адзіных эканамічных інстытутаў і заканчваючы палітычнымі органамі ўлады. "Вось калі б мы прынялі гэту канстытуцыю (Канстытуцыйны акт Саюзнай дзяржавы. — Заўвага БЕЛТА), як дамовіліся, на рэферэндуме, тады не паўстала б пытанне і аб адзінай валюце. Але вось тады адбыўся нейкі злом гэтага руху, правільнага руху, які ўжо дагаворна быў аформлены", — сказаў таксама лідар беларускай дзяржавы.

Акрамя таго, Аляксандр Лукашэнка падкрэсліў, што вельмі ўдзячны кіраўнікам Расіі, якія ніколі не адмаўлялі гэтага інтэграцыйнага працэсу: "Мы ішлі і рабілі канкрэтныя справы". Прэзідэнт дадаў, што цяпер інтэграцыя дасягнула такога ўзроўню, што паміж дзвюма краінамі няма межаў, ёсць адзіная эканамічная прастора, кааперацыйныя сувязі. Пры гэтым, на думку Прэзідэнта, беларуска-расійская інтэграцыя намнога больш глыбокая, чым у мытнай тройцы: "У нас агульная не толькі эканоміка, у нас, у прынцыпе, скаардынаваная агульная знешняя палітыка. Мы вельмі падобныя ва ўнутранай палітыцы адзін да аднаго".

Таксама беларускі лідар адзначыў, што ў Беларусі і Расіі адзіная абаронная палітыка: "Як ні было б складана, але мы стварылі адзіную групоўку ўзброеных сіл на заходнім напрамку, асновай якой з'яўляецца беларуская армія. Наогул у нас сёння абарона ў Беларусі будуецца, зыходзячы з прынцыпаў саюзніцкіх з Расіяй. Мы гэта абавязкова ўлічваем". Прэзідэнт дадаў, што можна яшчэ пералічваць мноства іншых станоўчых момантаў, якія дасягнуты ў ходзе інтэграцыі дзвюх краін, у тым ліку ў галіне адукацыі і аховы здароўя.

Прэзідэнт Беларусі Аляксандр Лукашэнка лічыць добрым варыянтам продаж Расіі нафтаперапрацоўчых заводаў пры ўмове доступу да здабычы расійскага прыроднага газу і нафты. "Чаму ў вас англічане, амерыканцы пампуюць нафту, прыродны газ, прадаюць на рынку, а беларусаў вы туды не пускаеце? — задаў Аляксандр Лукашэнка пытанне. — Вы хочаце ў нас удзельнічаць у прыватызацыі. Мы не супраць. Хочаце нафтаперапрацоўчыя заводы, якія ў Беларусі як цацкі — прыгожыя, сучасныя, еўрапейскія прадпрыемствы. Калі я на гэта пайду, мне ў Беларусі мала не здасца: мяне абвінавацяць, што я тут здаю, прадаю і г.д., як было з "Белтрансгазам", але мы вытрымалі гэту атаку".

"Ёсць добры варыянт: мы вам аддаём НПЗ, перапрацоўвайце сваю нафту і мы будзем перапрацоўваць тут сваю. Але вы дайце нам магчымасць здабываць самім як іншаземцам прыродны газ", — заявіў Аляксандр Лукашэнка.

"Мы спажываем 22 млрд. кубаметраў газу. Давайце мы 10 млрд. будзем здабываць. Можа, нам гэта будзе танней. Ваш дарагі газ, наш танны, які мы здабудзем на радовішчах, якія вы нам выдзеліце, як англічанам і амерыканцам, на роўных умовах, — сказаў беларускі Прэзідэнт. — Будзе 10 млрд. таннага газу і 12 млрд. дарагога расійскага. Для нас гэта будзе прымальна".

Паводле яго слоў, тое ж магло быць і па нафце. "Чаму мы ў Венесуэле здабываем нафту — за край свету? — падкрэсліў Аляксандр Лукашэнка. — Прытым мы будзем здабываць лепш, чым расійскія кампаніі, вы ніколі не прад'явіце нам прэтэнзій, што нешта разлілося, штосьці загарэлася і г.д.".

Беларусь спажывае сёння 23-24 млн.т нафты, можа перапрацаваць гэты аб'ём. "Давайце мы 10 млн.т здабудзем, а 14 млн.т у вас купім на такіх жа ўмовах, як BР, Shеll і іншыя. Не. Дык а чаму — не? Мы вам — заводы, а вы нам — магчымасць на ўмовах, якія прыняты ў Расіі для іншаземцаў, здабываць нафту", — сказаў Аляксандр Лукашэнка.

Арыентавацца на вопыт інтэграцыі ў Саюзнай дзяржаве пры фарміраванні АЭП і Еўразійскага эканамічнага саюза

"Калі мы маем магчымасць глыбінна дзейнічаць па гэтым напрамку — АЭП і Еўразійскаму эканамічнаму саюзу, то трэба даводзіць яго да ўзроўню Саюзнай дзяржавы, у прамым сэнсе выключаючы граніцы, візы і іншае (як у нас з расіянамі), і ісці далей, — сказаў Аляксандр Лукашэнка. — Да 2015 года хутчэй за ўсё мы сканцэнтруем на гэтым увагу".

Ён выказаў упэўненасць, што "ніхто не можа апярэдзіць Беларусь і Расію ў інтэграцыі па многіх-многіх прычынах — і эканамічных, і палітычных, і гістарычных, і перспектыўных".

"Трэба разам думаць, у якім напрамку рухацца, грунтуючыся на фундаментальных прынцыпах роўнасці, — лічыць Аляксандр Лукашэнка. — Не бывае вялікіх і малых народаў — народы павінны быць раўнапраўнымі, асабліва пры будаўніцтве саюза. Саюзы не могуць быць даўгавечнымі, калі яны пабудаваны не на ўзаемапавазе і не на раўнапраўнай аснове".

Самае галоўнае — вызначыцца з тым, што на гэтым этапе найбольш прыярытэтна, падкрэсліў беларускі лідар.

Гаворачы аб перспектывах стварэння парламенцкага вымярэння еўразійскай эканамічнай інтэграцыі, Аляксандр Лукашэнка адзначыў: "Мы занялі пазіцыю такую — не ўмешваемся, нічога не гаворым. Вось няхай гіганты (Казахстан і Расія. — Заўвага БЕЛТА) і вызначацца: будзе ў нас парламент ці не". Прэзідэнт дадаў, што раней у будаўніцтве Саюзнай дзяржавы былі пэўныя перашкоды: "Мы з Ельцыным, з той камандай, якая ў яго была, мы іх пераадольвалі. І з маладым, у першым прышэсці, Пуціным мы дамаўляліся, як бы ні было складана. І цяпер Еўразійскі эканамічны саюз гэта ўсё павінен прайсці".

"Як толькі Казахстан пагодзіцца, мы нікуды не дзенемся", — адзначыў Аляксандр Лукашэнка, развіваючы тэму парламенцкага вымярэння еўразійскай эканамічнай інтэграцыі. Ён дадаў, што гэта будзе цяжкі працэс. Кіраўнік беларускай дзяржавы падкрэсліў, што ў гэтым працэсе павінен быць не толькі ўлік інтарэсаў, але і рух насустрач: "Расія павінна пайсці насустрач нам і Казахстану".

Аляксандр Лукашэнка, гаворачы аб Казахстане, таксама адзначыў, што гэта дзяржава з вялікай тэрыторыяй і насельніцтвам 15 млн. чалавек: "Усё ёсць: уран, прыродны газ, нафта, Байканур. Гэта ж распрацаваныя радовішчы і ў асноўным аддадзеныя замежнаму капіталу, не расійскаму. Якая залежнасць у Казахстана і Расіі? Значна ніжэйшая, чым у Беларусі, а ў перспектыве, напэўна, ніякая. Таму Расія гэта павінна ўлічваць".

Акрамя таго, Прэзідэнт Беларусі дадаў: "Мы, вядома, будзем ісці тым жа шляхам, як мы ішлі, будуючы Саюз Беларусі і Расіі. У нас ёсць вопыт, у нас ёсць веды, мы практычна гэта робім. Больш складана будзе Казахстану".

"Мы вельмі дорага заплацілі за Адзіную эканамічную прастору. І цяперашні прэм'ер, і прэзідэнт Расіі гэта прызнаюць і аддаюць належнае Беларусі", — адзначыў Аляксандр Лукашэнка. Пры гэтым ён нагадаў, што калі Расія ўступала ў СГА, Беларусь не перашкаджала ёй ні ў чым і па ўсіх пытаннях пайшла насустрач Расіі.

Цаной уступлення ў АЭП стаў і крызіс беларускай фінансава-эканамічнай сістэмы, калі Беларусі давялося ўвесці загараджальныя пошліны на ўвоз іншамарак. "Адтэрміноўка была некалькі месяцаў, за гэтыя 8-10 месяцаў беларусы вывезлі $3 млрд. з краіны — палавіну золатавалютных рэзерваў. І калі мы ўбачылі, што ўвогуле без рэзерваў застанемся, мы вымушаны былі адпусціць курс нацыянальнай валюты, такім чынам, адбылася дэвальвацыя. Плюс у той жа час павышэнне цэн на энерганосьбіты", — канстатаваў Прэзідэнт.

Але дзяржава не пайшла з эканомікі, фінансаў, не адпусціла ўсё на водкуп дзікаму рынку, да якога яе схілялі. Дзеючая ў краіне сістэма, рычагі кіравання, кантролю не далі магчымасці гэта зрабіць. "Сёння ўсе зразумелі, што так, беларусы мелі рацыю, не пайшоўшы з эканомікі", — адзначыў Прэзідэнт.

Цяпер, калі Расія ўступіла ў СГА, трэба прывыкаць, проста працаваць і, відаць, змагацца ў такіх умовах, адзначыў Аляксандр Лукашэнка. "Мы поўныя рашучасці гэта вытрымаць, у нас шмат было выпрабаванняў на нашым вяку, мы іх вытрымалі. Але мы заўсёды на перагаворах з расійскім кіраўніцтвам нагадваем аб тым, што Расія ні ў якім выпадку не павінна на гэтым шляху кідаць Беларусь. Мы атрымліваем станоўчыя адказы. Як будзе далей? Пажывём — убачым", — рэзюмаваў кіраўнік дзяржавы.

Беларуская палітычная і эканамічная сістэмы сканцэнтраваны на дастойным жыцці людзей

"Вядома, усіх не абагрэеш, я гэта дакладна разумею. Але ў Беларусі магчымасці для таго, каб жыць і працаваць, ёсць. Толькі трэба паварушыцца, — адзначыў кіраўнік дзяржавы. — Нашым людзям трэба больш спадзявацца на сябе. Я часта гавару, што, можа, нават занадта іх апекаваў і апякую, таму ў нас прынята гаварыць, што калі ёсць нейкая праблема, то ўлада або Прэзідэнт іх вырашаць. Гэта няправільны ўхіл, які мы дапусцілі ў сваёй палітыцы".

Аднак, паводле слоў Прэзідэнта, беларускае грамадства разумее, што "ўлада не прагуляла гэты час". "Нам жа ўсё давялося ствараць: у нас не было інстытутаў улады, ні суверэннай эканомікі", — нагадаў Аляксандр Лукашэнка. Ён падкрэсліў, што для беларускай эканомікі вельмі важны экспарт. "Тут мы залежныя ад сусветнага крызісу на нашых традыцыйных рынках у Расіі і ў Еўрасаюзе. Мы крыху больш прадаём у Еўрасаюз, чым у Расію, і калі там непаспяховая сітуацыя і хістаюцца рынкі, то для нас гэта таксама дрэнна. У нас экспартаарыентаваная эканоміка — прадаём каля 80 працэнтаў таго, што вырабляем, і мы залежныя ад эканамічных праблем", — заявіў кіраўнік дзяржавы. Таксама Прэзідэнт адзначыў, што Беларусі неабходна строгая стабільнасць на валютна-фінансавых напрамках.

"У знешняй палітыцы Беларусь не мае ніякага глабалізму, мы вызначылі сваю знешнюю палітыку як шматвектарную. Мы не хочам спрачацца і сварыцца з Еўрасаюзам, хочам жыць у дружбе і з Расіяй. Мы не проста партнёры, мы павінны жыць як родныя людзі і родныя дзяржавы", — заявіў Прэзідэнт. Ён дадаў, што і сваім суседзям Беларусь не стварае ніякіх праблем, нягледзячы на тое, што некаторыя дзяржавы "незадаволены тым, што адбываецца ў Беларусі".

У Беларусі ідзе работа над дыверсіфікацыяй эканомікі, нарошчваннем аб'ёмаў вытворчасці на мясцовай сыравіне, заявіў Прэзідэнт Беларусі. "Прыкладна 80-85 працэнтаў нашай эканомікі — гэта экспарт, — адзначыў Аляксандр Лукашэнка. — Мы зусім няшмат спажываем з таго, што вырабляем, унутры Беларусі. Такая структура склалася яшчэ з савецкіх часоў. Мы ад яе не адмовіліся, але дыверсіфікаваць яе пачалі. Адна з найважнейшых задач, якая сёння стаіць перад краінай, і, вядома, яе прэзідэнтам, — дыверсіфікацыя нашай эканомікі".

"Мы прынялі рашэнне, каб дыверсіфікаваць эканоміку і пачаць мадэрнізацыю і нарошчванне аб'ёмаў вытворчасці і прадпрыемстваў, якія працуюць на мясцовай сыравіне", — сказаў кіраўнік дзяржавы.

Як прыклад Прэзідэнт прывёў дрэваапрацоўку, адзначыўшы, што 30 з нечым працэнтаў тэрыторыі Беларусі пакрыта лясамі. Гэты лес добрай якасці і падыходзіць для будаўніцтва і вытворчасці канчатковай прадукцыі, напрыклад мэблі. "Мы пачалі развіваць мэблевую вытворчасць, мы мадэрнізуем усе дрэваапрацоўчыя камбінаты, у гэтым, у будучым годзе поўнасцю гэты працэс скончым. У нас будзе каля дзясятка магутнейшых аб'яднанняў, якія будуць вырабляць сучасную прадукцыю. Вось такім чынам мы спрабуем эканоміку дыверсіфікаваць і завязаць яе на мясцовай сыравіне", — растлумачыў Прэзідэнт.

Таксама інтэнсіўна развіваецца сельская гаспадарка, дасягнуты пэўныя поспехі, адзначыў кіраўнік дзяржавы. "Мы не толькі накармілі свой народ, але і ў бягучым годзе $5 млрд. экспартуем сельскагаспадарчай прадукцыі", — сказаў Аляксандр Лукашэнка. Праз два гады экспарт сельскагаспадарчай прадукцыі дасягне $7 млрд., дадаў ён.

"Больш за тое, мы поўнасцю перааснасцілі базы захоўвання сельскагаспадарчай прадукцыі, яны сталі выключна сусветнага ўзроўню. Мы можам захоўваць прадукцыю да вясны і прадаваць яе тады, калі выгадна вытворцу. Таксама мы поўнасцю перааснасцілі перапрацоўку сельскагаспадарчай прадукцыі. Гэта вельмі вялікая частка нашай эканомікі", — адзначыў кіраўнік дзяржавы.

"Калі ўлічыць, што селянін стварае для семярых рабочыя месцы ў краіне, гэта дарагога каштуе. Вось чаму мы ўхапіліся за сельскую гаспадарку і вельмі інтэнсіўна развіваем сельскагаспадарчую вытворчасць", — растлумачыў Аляксандр Лукашэнка.

Закрануў Прэзідэнт і пытанне аплаты насельніцтвам жыллёва-камунальных паслуг. Яна будзе павялічвацца ў прывязцы да росту даходаў. "Палітыка ў сферы ЖКГ змяняецца, — падкрэсліў кіраўнік дзяржавы. — Цяпер каля 70 працэнтаў расходаў на аказанне жыллёва-камунальных паслуг — датацыйныя, у сярэднім 30 працэнтаў расходаў аплачвае насельніцтва. І гэты паказчык будзе павялічвацца. Але спачатку трэба чалавеку заработную плату даць!".

Паводле слоў Прэзідэнта, рэальная заработная плата за бягучы год узрасце, паводле разлікаў, як мінімум на 11 працэнтаў. Ён дадаў, што "зарплата ў памеры $500 для Беларусі — гэта паказчык, хоць і ў 2,5 раза ніжэйшы, чым у Расіі".

Аляксандр Лукашэнка прызнаў, што ў сістэме ЖКГ ёсць праблемы, але безгаспадарнасці няма: "Скаргаў шмат, асабліва ў крызісны перыяд. Але, па вялікім рахунку, мы людзей не кінулі. І пакуль мы не знойдзем дастойнай замены цяперашнім структурам, на злом існуючай сістэмы не пойдзем".

Закранаючы яшчэ адно актуальнае пытанне, Аляксандр Лукашэнка заявіў, што пераважная большасць насельніцтва падтрымлівае рашэнне аб будаўніцтве ў Беларусі АЭС.

"Вельмі-вельмі было цяжка, але мы гэта рашэнне прынялі, і цяпер большасць насельніцтва падтрымлівае гэта рашэнне", — адзначыў кіраўнік дзяржавы. Галоўны аргумент быў у тым, што па перыметры Беларусі ўжо існуюць атамныя станцыі, прытым многія з гэтых станцый былі ўведзены ў эксплуатацыю ў савецкі перыяд. "Мы ўжо маем гэты страх, ён вакол нашых граніц. Таму будаўніцтва ўласнай станцыі баяцца няма чаго", — канстатаваў Аляксандр Лукашэнка. "Будуецца самая сучасная станцыя, яна нам патрэбна. Гэта не толькі танная энергія, гэта меншая залежнасць ад паставак прыроднага газу", — растлумачыў кіраўнік дзяржавы.

Як адзначыў першы віцэ-прэм'ер Уладзімір Сямашка, пры выкарыстанні арганічнага паліва (напрыклад, газу, нафты) сабекошт выпрацоўкі электраэнергіі знаходзіцца ў прамой лінейнай залежнасці ад яго цаны. "Падаражэў газ у два разы, значыць, падаражэла выпрацоўка электраэнергіі ў два разы", — адзначыў ён. На АЭС адваротная квадратычная залежнасць. "Толькі 15-20 працэнтаў ад сабекошту — гэта кошт паліва", — растлумачыў Уладзімір Сямашка.

"Мы прынялі гэта рашэнне, як ні было б складана. І, напэўна, у нас, у прынцыпе, і выбару не было. І цяпер па ўсіх пытаннях пераважная большасць насельніцтва падтрымлівае гэты праект", — прадоўжыў Аляксандр Лукашэнка.

"Ну і потым, гэта ж высокія тэхналогіі. Будаўніцтва атамнай станцыі, а потым эксплуатацыя — гэта ж космас. Космас на зямлі", — падкрэсліў кіраўнік дзяржавы. Гэта адзін з напрамкаў высокіх тэхналогій, на якія трэба арыентавацца, калі нацыя хоча развівацца і быць у шэрагу высокаадукаваных, канстатаваў Аляксандр Лукашэнка.

У Беларусі не прынята жыць напаказ, сказаў Аляксандр Лукашэнка. "Вядома, у нас таксама ёсць сацыяльнае расслаенне, можа, яно не такое відавочнае, як у іншых краінах. У нашай краіне калі ты хочаш зарабіць, ты заробіш", — падкрэсліў Прэзідэнт. Ён таксама дадаў, што ў беларускім грамадстве не вітаецца хвальба. "У нас людзі не любяць выварочваць свой дастатак напаказ — гэта асаблівасць менталітэту. У гэтым наша грамадства можна назваць больш савецкім. І я думаю, што гэта не зусім дрэнна", — сказаў ён.

Таму, паводле слоў Аляксандра Лукашэнкі, на вуліцах у Беларусі радзей сустракаеш раскошныя і вельмі дарагія машыны, і гэта правіла дзейнічае на ўсіх узроўнях. "Мне на дзень нараджэння падарылі "Майбах". Вытворчасць гэтых машын ужо закрыта. Я аддаў яе дзяржаве, яна стаіць у дзяржаўным гаражы. Аднак я на ёй не езджу. Нават мой вадзіцель разумее, што нясціпла ездзіць на такой машыне", — расказаў кіраўнік дзяржавы. "У нас не прынята выхваляцца, і я з гэтым згодны", — сказаў на заканчэнне ён.

Партыі ў Беларусі не павінны з'яўляцца з падачы ўлады

Як адзначыў Прэзідэнт, палітычная сістэма беларускага грамадства ў прынцыпе нічым не адрозніваецца ад расійскай. Аднак і з боку некаторых палітыкаў у Расіі часам чуваць крытыка ў адрас мажарытарнай сістэмы парламенцкіх выбараў у Беларусі. "Я выбіраўся не адзін раз і дэпутатам быў. Я добра ведаю, што такое партыйная сістэма, гледзячы на Расію, і што такое мажарытарная сістэма, — адзначыў кіраўнік дзяржавы. — Партыйная сістэма — гэта калі 2-3 чалавекі наверсе ўсім вядомыя, а ўсіх астатніх ніхто не ведае, або там ледзь не бандытаў і алігархаў, якія нажылі сваё багацце незразумела за якія грошы, выбіраюць, і людзі гэтага не ведаюць. Гэта што, нармальная сістэма выбараў? Я лічу — не".

Паводле слоў Аляксандра Лукашэнкі, нягледзячы на тое, што ў Беларусі існуюць 15 палітычных партый, людзі рэальна ведаюць толькі вельмі нямногія з іх. "Я лічу, што партыйная сістэма павінна скласціся. Партыі не павінны з'яўляцца з падачы ўлады — праўладныя партыі — зразумела, якое стаўленне да іх. Таму я гэты працэс у Беларусі не падтрымліваю. І паколькі мы яшчэ не склаліся і не сфарміравалі гэту партыйную сістэму, няхай людзі выбіраюць сваіх дэпутатаў па акругах. І мы далі права любой партыі, нават калі ў гэтай акрузе няма яе прадстаўніка, вылучаць сваіх людзей", — сказаў Прэзідэнт.

"Але далей, можа, і трэба ісці да гэтай партыйнай сістэмы. Мы гэты працэс не стрымліваем. І я паабяцаў, што я не буду падштурхоўваць працэс фарміравання палітычных партый і іх станаўлення, але я не буду гэтаму перашкаджаць і буду яго падтрымліваць", — дадаў Аляксандр Лукашэнка.

Што датычыцца ўнутрыдзяржаўнай палітыкі ў Беларусі, Прэзідэнт сказаў: "Вы яе бачыце. Усё павінна быць сарыентавана і рабіцца для народа. Гэта — галоўнае. І гэта не папулізм". "Гэта мая палітыка, народ мяне выбраў, і для яго мы павінны рабіць усё, не панукаючы і не патураючы народу, не ствараючы нейкіх празмерных прэферэнцый для гультайства, — падкрэсліў кіраўнік дзяржавы. — Але мы дакладна разумеем, што правы людзей павінны быць захаваны. І сапраўдныя правы!"

У сувязі з гэтым Аляксандр Лукашэнка згадаў аб крытыцы наконт захавання правоў чалавека ў Беларусі і прывёў прыклад падзей у Іспаніі, Партугаліі, Грэцыі, Германіі, Францыі. "Затрымлівалі па 200-300 чалавек", — адзначыў ён. "Лічу, што права чалавека — гэта, найперш, права на жыццё. І вакол жыцця чалавека мы павінны стварыць усё, перш за ўсё, бяспеку. Гэта — права на працу, нармальную заработную плату, каб гэты чалавек мог аплаціць камунальныя паслугі і пракарміць сваю сям'ю, — адзначыў беларускі лідар. — Хочаш багатым быць — гэта ўжо не клопат дзяржавы. Мы павінны ўмовы ствараць, але, каб быць багатым або алігархам, тут трэба ўключацца па поўнай і працаваць".

Аляксандр Лукашэнка лічыць, што не варта раскручваць у СМІ правакацыйныя выпады супраць дзяржавы і царквы. Не варта рэагаваць на правакацыйныя выхадкі радыкальных актывістаў і груп так, каб на роўным месцы стваралася праблема, а правакатары станавіліся героямі.

Таксама Прэзідэнт Беларусі паведаміў, што на нядаўняй сустрэчы з Патрыярхам Маскоўскім і ўсяе Русі Кірылам у Мінску ён закранаў праблему антыхрысціянскіх радыкальных акцый: "З Патрыярхам мы закранулі тэму, але не сказаў бы, што мы ўжо вельмі паглыбляліся".

Адказваючы на пытанне наконт антыхрысціянскіх скандальных акцый, кіраўнік беларускай дзяржавы сказаў: "Калі вы маеце на ўвазе гэту групу (удзельніц акцыі ў Храме Хрыста Збавіцеля. — Заўвага БЕЛТА), трэба, перш чым што-небудзь рабіць, падумаць і з намі параіцца, таму што мы горкі вопыт маем работы з палітычнымі вось такімі групамі. Яны нічога не значылі тады, а цяпер... Таму трэба быць больш акуратнымі, трэба быць да гэтага гатовымі, трэба гэтаму процістаяць. І вось у чым я тут згодны з Патрыярхам, тут вялікую лепту, пакуль негатыўную, уносяць расійскія сродкі масавай інфармацыі. Вы ведаеце якія".

Акрамя таго, Прэзідэнт дадаў: "Патрэбна больш усебаковая і грунтоўная работа. Усім нам трэба перабудоўвацца, у тым ліку і Царкве. І перабудоўвацца, і прыстасоўвацца да той сітуацыі, якая сёння існуе".

Прэзідэнт Беларусі Аляксандр Лукашэнка не супраць шырокага святкавання 90-годдзя ўтварэння СССР. "Мы ўсё зробім і падтрымаем, што будзе звязана з 90-годдзем СССР, так, як гэта было, калі мы разам святкавалі Дзень Перамогі. Калі будзе ў вас, расіян, жаданне, за намі не заржавее", — адзначыў Аляксандр Лукашэнка. "Вы ведаеце нашы адносіны да Савецкага Саюза. Калі б не было СССР, не было б Беларусі, прынамсі, у гэтым выглядзе", — дадаў Прэзідэнт.

Скарачэнне дзяржапарату дапаможа зменшыць бюракратызм

"Цяпер пастаўлена задача, працуе дзяржаўная камісія, — недзе на чвэрць мы скарачаемся для таго, каб мець магчымасць павысіць зарплату дзяржслужачым. У супрацьлеглым выпадку народ не прыме гэта павышэнне", — сказаў кіраўнік дзяржавы.

Аляксандр Лукашэнка таксама адзначыў, што ідзе рэфармаванне органаў унутраных спраў: "Кампактная будзе сістэма, без празмернасцяў".

"Дзяржслужачых мы недзе на чвэрць павінны скараціць. Менш будзе бюракратызму", — лічыць Прэзідэнт.

Напрыканцы — пра хакей і футбол...

Беларусь у высокай ступені гатова да правядзення чэмпіянату свету па хакеі ў 2014 годзе, заявіў Прэзідэнт. "Нам засталося завяршыць будаўніцтва некалькіх гасцініц, і, у прынцыпе, краіна будзе гатова да правядзення чэмпіянату свету. Другая арэна маючага адбыцца чэмпіянату — у Чыжоўцы — будзе гатова ўжо ў наступным годзе. Так што фактычна Мінск гатовы", — адзначыў Прэзідэнт.

Аляксандр Лукашэнка расказаў, што 30 лістапада ў Мінск прыбудзе чарговая інспекцыя пад кіраўніцтвам кіраўніка Міжнароднай федэрацыі хакея Рэнэ Фазеля. Яна павінна даць ацэнку гатоўнасці Беларусі да маючага адбыцца чэмпіянату. "Мы будавалі гэтыя аб'екты для сябе, і ў Міжнароднай федэрацыі хакея ўбачылі, што ў Беларусі людзі жывуць спортам, гатова практычна інфраструктура, мы дабудуем тое, чаго не хапае, таму далі нам гэты чэмпіянат. Для Беларусі гэта будзе падзея", — адзначыў кіраўнік дзяржавы.

"Калі б чэмпіянат быў нават заўтра, мы ўсё роўна ўсіх рассялілі б. У нас вакол Мінска ўсе санаторыі знаходзяцца ў выдатным стане і гатовы прыняць гасцей. Накарміць людзей мы таксама зможам: у нас дастаткова розных рэстаранаў і кафэ, калі трэба — мы пабудуем яшчэ", — падкрэсліў Прэзідэнт.

У той жа час кіраўнік дзяржавы назваў гульню зборнай Беларусі па футболе з Іспаніяй ганьбай для нацыі. "Такой ганьбы для нацыі, як гуляла наша зборная, няхай нават з чэмпіёнамі свету, я не бачыў", — падкрэсліў Аляксандр Лукашэнка. "Выйсці на поле з дрыжачымі рукамі і нагамі... Грузія гуляла 0:0 да апошняй мінуты, выпадкова іспанцы гол забілі, а мы?" — дадаў кіраўнік дзяржавы.

Паводле паведамленняў БЕЛТА.