Сёння адбудзецца суд над Сяргеем Каваленкам

Источник материала:

7 студзеня сябар КХП БНФ Сяргей Каваленка вывесіў бел‑чырвона‑белы сьцяг на галоўнай ёлцы Віцебску. За гэта яго вінавацяць у злосным хуліганстве. Яго таксама вінавацяць у тым, што ён аказаў супраціў міліцыянтам падчас затрыманьня. Паводле двух крымінальных артыкулаў, Сяргею Каваленку пагражае да 5 год абмежаваньня волі.

Суд па крымінальных абвінавачаньнях супраць Сяргея Каваленкі будзе адбывацца 12 траўня «з другой спробы». Першапачаткова працэс быў прызначаны на 20‑га красавіка, але ў той дзень ён так і не адбыўся. Афіцыйная прычына пераносу працэсу — тое, што ў прызначанага судзьдзі Яўгена Бурунова былі пільныя асабістыя cправы.

Аднак аднадумцы актывіста не выключаюць, што працэс перанесьлі праз тое, што каля Кастрычніцкага райсуду сабралася шмат ахвотных падтрымаць Сяргея Каваленку. А ён сам, падыходзячы да суду, разгарнуў на вачох у прысутных вялікі бел‑чырвона‑белы сьцяг.

Гэтую акцыю палічылі хуліганствам, і 21 красавіка Сяргею Каваленку прысудзілі 7 сутак арышту. Удзельнікамі несанкцыянаванага пікету былі прызнаныя таксама сябар актывіста Тарас Сурган і малодшы брат Віталь Каваленка. Абодва хлопцы таксама адседзелі «суткі».

Сяргей Каваленка ўпэўнены, што і гэтым разам аднадумцы прыйдуць падтрымаць яго — 10.30, Кастрычніцкі раённы суд:

«Канешне, прыйдзе шмат народу. Таму што беларусы моцная, сьмелыя людзі. Годныя. І ўсе, хто годны і сьмелы, прыйдуць мяне падтрымаць!»

Сяргея Каваленку будуць судзіць паводле абвінавачваньняў у злосным хуліганства. Ён можа атрымаць да 5‑ці год абмежаваньня волі. Сам Каваленка катэгарычна ня згодны з такім абвінавачваньнем:

«7‑га студзеня я ўзьняў сьцяг на галоўнай гарадзкой ёлцы. І гэта была палітычная акцыя, а не хуліганская. Хуліганскай яна была б, каб я кагосьці абразіў, зьбіў ці папсаваў маёмасьць. А такога не было, таму ўсё гэта — хлусьня. Я хацеў паказаць людзям, які ў нас прыгожы, правільны сьцяг — бел‑чырвона‑белы».

Віцебскага сябра КХП БНФ таксама будуць судзіць паводле артыкулу 363 — за супраціў міліцыянтам, якія яго затрымлівалі.

З матэрыялаў крымінальнай справы, якія складаюць тры тамы, актывіст даведаўся, што трое міліцыянтаў ‑‑ падпалкоўнік Андрэй Іваноў, малодшы сяржант Максім Максімаў і старшы сяржант Васіль Палітыка — патрабуюць ад яго яшчэ й кампэнсацыі маральнай шкоды ў памеры 10 мільёнаў кожнаму. Яны цьвердзяць, што апазыцыянэр іх публічна абражаў.

Сяргей Каваленка двойчы зьвяртаўся ў Кастрычніцкі райсуд, каб распачаць справу супраць гэтых супрацоўнікаў міліцыі за тое, што яны нанесьлі яму пашкоджаньні. Але двойчы суд яму ў гэтым адмовіў.

За час сьледзтва, якое вялося з таго самага 7 студзеня, Сяргей Каваленка быў спачатку затрыманы, а потым зьмешчаны ў сьледчы ізалятар на два месяцы.

Праўда, празь некалькі дзён яго адтуль вызвалілі пад падпіску аб нявыезьдзе. Апазыцыянэр прайшоў псыхіятрычную экспэртызу, у ягонай кватэры быў праведзены ператрус. У дзяржаўных газэтах былі надрукаваныя артыкулы, дзе ўчынак Сяргея Каваленкі апісвалі як злачынны. У газэце «Віцебскі рабочы», да прыкладу, апазыцыянэра назвалі «мутантам, якому месца ў клетцы заапарку».

Радыё Свабода