ХРОНІКА АПОШНІХ ПАДЗЕЙ

Источник материала:

Ватыкан заявіў пра дзясяткі мірных лівійцаў, загінулых пад бамбёжкамі

Упершыню з пачатку ваеннай аперацыі Захаду ў Лівіі з незалежнай крыніцы паступіла вестка пра ахвяр сярод мірнага насельніцтва. Прадстаўнік Ватыкана ў Трыпалі паведаміў пра забойства 40 чалавек у выніку бамбардзіроўкі кааліцыяй у лівійскай сталіцы. НАТА, да якой ад ЗША перайшло камандаванне місіяй у Лівіі, абяцае пачаць расследаванне.

Паводле слоў вікарыя Джавані Марцінэлі, адзін з удараў разбурыў жылы будынак, у якім і знаходзіліся людзі. Ён удакладніў, што атрымаў гэтыя звесткі адразу з некалькіх "паважаных крыніц", перадае афіцыйнае інфармагенцтва Ватыкана Fіdеs.

"Так званыя гуманітарныя рэйды прыводзяць да ахвяр сярод грамадзянскага насельніцтва, — піша святар. — Нават калі бамбаванні накіраваны на ваенныя аб'екты, закранутым аказваецца і мірнае насельніцтва, на абарону якога нібы разлічана міжнародная аперацыя".

Нагадаем, дагэтуль лівійскія ўлады адчайна спрабавалі пераканаць свет у тым, што ўдары кааліцыі прыводзяць да шматлікіх мірных ахвяр. Самі ўдзельнікі кааліцыі сцвярджаюць, што ў іх няма ніводнага сведчання пра ахвяр сярод мірных жыхароў.

МЗС дазваляе адпачынак у Егіпце

Міністэрства замежных спраў Расіі абвясціла пра нармалізацыю становішча на найбольш папулярных сярод расіян егіпецкіх курортах Хургада і Шарм-эль-Шэйх.

МЗС рэкамендуе расіянам наведваць толькі гэтыя курорты, пазбягаючы іншых раёнаў краіны. Таксама міністэрства раіць турыстам карыстацца паслугамі правераных тураператараў і падарожнічаць вялікімі групамі. Першыя рэйсы на егіпецкія курорты будуць адпраўлены 2-3 красавіка, паведамляе Асацыяцыя тураператараў Расіі.

Раней МЗС РФ неаднаразова заклікала грамадзян Расіі ўстрымацца ад паездак на любыя курорты Егіпта ў сувязі з нестабільным палітычным становішчам у краіне.

Вялікую Айчынную вайну вярнулі ў падручнік гісторыі Украіны

У новым падручніку гісторыі Украіны для 11-х класаў зноў уводзіцца паняцце Вялікай Айчыннай вайны. Раздзел падручніка пра вайну 1939—1945 гадоў будзе звацца "Украіна падчас Другой сусветнай вайны. Вялікая Айчынная вайна", хоць у папярэдняй рэдакцыі кнігі ад 2005 года адпаведная частка насіла назву "Украіна ў гады Другой сусветнай вайны". З тэкстам новага падручніка азнаёмілася газета "Сёння".

У папярэдняй рэдакцыі падручніка "Вялікая Айчынная вайна" таксама сустракалася, аднак падкрэслівалася, што гэты тэрмін быў уведзены савецкімі ідэолагамі. Іншыя змены датычацца ролі і значэння Украінскага паўстанцкага войска (УПВ). Станоўчых ацэнак яе ролі не было і ў рэдакцыі 2005 года, аднак у новым падручніку дзеянні УПВ падчас вайны займаюць прыблізна той жа аб'ём, што і аповед пра савецкіх партызанаў, паведамляе "Сёння". У старым падручніку інфармацыі пра дзеянні УПВ было прыкладна столькі ж, колькі пра бітвы Чырвонай арміі. Акрамя таго, у тэксце знікла згадванне пра 47 баёў УПВ з немцамі і 54 баі з савецкімі партызанамі.