Аб праблемах школьнага падручніка... адкрыта і галосна

Источник материала:

Намер адкрыць на адукацыйным інтэрнэт-партале (www.аdu.bу) рубрыку "Праблемы школьнага падручніка" агучыў на нарадзе камісіі па экспертызе і дапрацоўцы вучэбных праграм для агульнаадукацыйных школ дырэктар Нацыянальнага інстытута адукацыі Генадзь ПАЛЬЧЫК.

Не сакрэт, што школьныя падручнікі сталі ці не галоўным аб'ектам крытыкі ў рэфармаванай школе. За што толькі не лаюць іх настаўнікі, рэпетытары і бацькі: і за празмерны акадэмізм і складаную для школьнікаў тэрміналогію, і за памылкі, і за адсутнасць міжпрадметных сувязяў.

— Новая рубрыка на нашым сайце стане своеасаблівым анлайн-каналам для экспертызы падручнікаў, дзе сваё меркаванне і заўвагі да падручнікаў зможа выказаць кожны, — дадаў Генадзь Пальчык. — Штодня адукацыйны інтэрнэт-партал наведвае ад 2-х да 3-х тысяч карыстальнікаў, а ў жніўні, напярэдадні новага навучальнага года, мы рэгіструем да 12 тысяч наведванняў у суткі. Сайт дае магчымасць наладжвання пастаяннага дыялогу па пытаннях агульнай сярэдняй, дашкольнай і спецыяльнай адукацыі, у тым ліку і па пытаннях стварэння нацыянальных падручнікаў...

Сёння мэтазгодна гаварыць не проста пра падручнік як пра асноўны сродак навучання, а пра вучэбна-метадычны комплекс, які, акрамя падручніка, уключае ў сябе вучэбныя дапаможнікі для вучня (у тым ліку электронныя адукацыйныя рэсурсы) і вучэбна-метадычны дапаможнік для настаўніка.

У ранейшыя часы падчас падрыхтоўкі падручнікаў заключаліся прамыя пагадненні з аўтарамі, якія ў дамоўлены час прад'яўлялі свой рукапіс. Але апошняе пакаленне нацыянальных падручнікаў ствараецца ўжо на конкурснай аснове. У гэтым і заключаецца навізна ў падрыхтоўцы падручнікаў. Галоўнай мэтай конкурсу з'яўляецца стварэнне стабільных падручнікаў высокай якасці. Яго правядзенне дазваляе адабраць лепшыя з заяўленых рукапісаў вучэбных дапаможнікаў. Над некаторымі падручнікамі ў Беларусі працуюць цяпер адначасова 2-3 аўтарскія калектывы.

Генадзь Пальчык паведаміў, што ў 2010/2011 навучальным годзе была праведзена навуковая экспертыза 27 вучэбных дапаможнікаў для ўстаноў агульнай сярэдняй адукацыі, у якой удзельнічалі 22 навукоўцы Нацыянальнай акадэміі навук і Вышэйшай атэстацыйнай камісіі Рэспублікі Беларусь. Па выніках навуковай экспертызы 22,3 працэнта вучэбных дапаможнікаў атрымалі найвышэйшую адзнаку 15 балаў і былі рэкамендаваныя для выкарыстання ў навучальным працэсе без заўваг. Сярод іх падручнік па фізіцы для 6-га, 8-га і 9-га класаў, па гісторыі Беларусі для 8-га класа, рускай літаратуры для шасцікласнікаў і беларускай літаратуры для вучняў 10-х класаў.

48,2 працэнта дапаможнікаў былі ацэненыя на 14—13 балаў і рэкамендаваныя для выкарыстання з нязначнымі заўвагамі.29,5 працэнта падручнікаў атрымалі 12-10 балаў і былі рэкамендаваныя для выкарыстання з асобнымі заўвагамі і прапановамі.

У 2011/2012 годзе на навуковую экспертызу будзе прадстаўлена 17 падручнікаў і вучэбных дапаможнікаў: па геаметрыі, інфарматыцы, геаграфіі, біялогіі, хіміі, беларускай мове і іншых дысцыплінах.

Натуральна, што кожны падручнік абавязкова праходзіць доследную праверку. І калі падчас апрабацыі падручніка высвятляецца, што дзеці не разумеюць вучэбны матэрыял, што настаўніку цяжка растлумачыць вучням нейкую тэму, падручнік адпраўляецца на дапрацоўку. У прайшоўшым навучальным годзе доследная праверка праводзілася па 42 вучэбных выданнях на базе 102 устаноў агульнай сярэдняй адукацыі і 24 устаноў спецыяльнай адукацыі. У ёй былі задзейнічаны 21 вучоны, 11 спецыялістаў Акадэміі паслядыпломнай адукацыі і інстытутаў развіцця адукацыі і 295 школьных настаўнікаў.

У рамках доследнай праверкі праводзілася анкетаванне настаўнікаў, бацькоў і саміх навучэнцаў, а таксама наведванне 300 урокаў. Прайшлі 80 нарад са школьнымі настаўнікамі і 22 "круглыя сталы" з удзелам аўтараў і экспертаў. Па выніках доследнай праверкі 40 вучэбных дапаможнікаў былі рэкамендаваныя да перавыдання з рознай ступенню дапрацоўкі, а па двух вучэбных выданнях, прызначаных для устаноў спецыяльнай адукацыі, была дадзена адмоўная ацэнка.

У новым навучальным годзе доследная праверка будзе праведзена яшчэ па 35 вучэбных выданнях...

Надзея НІКАЛАЕВА.